Sumqayıt şəhər 22 nömrəli tam orta məktəbdə Azərbaycan Respublikasının Prezidenti yanında Bilik Fondunun xətti ilə mühazirə təşkil olunub. Xeberle.com-un məlumatına görə, mühazirəyə Sumqayıt şəhərinin ümumtəhsil məktəblərinin 2-ci və 3-cü siniflərində dərs deyən ibtidai sinif müəllimləri iştirak edib. Fondun Sumqayıt şəhəri üzrə nümayəndəsi Tahirə Səfərova mühazirədə iştirak edən dinləyicilərə Bilik Fondu haqqında ətraflı məlumat verib və Sumqayıt Şəhər Təhsil Şöbəsinin metodisti, Bilik Fondunun mühazirəçisi Əlhəddin Paşayevi dinləyicilərə təqdim edib.
Mühazirəçi "İbtidai sinif müəllimləri üçün təhsil siyasətini əks etdirən sənədlər” mövzusunda şəhər ziyalıları və ibtidai sinif müəllimləri qarşısında təqdimatla çıxış etməklə bərabər mühazirə söyləyib.  
Əlhəddin Paşayev mühazirəsində Azərbaycanda dövlətin təhsil sahəsinə göstərdiyi diqqət və qayğıdan söz açıb.  Təhsil islahatının ən çətin islahatlardan biri olduğunun qeyd edən Ə. Paşayev  təhsil islahatının həyata keçirilməsi prosesisinin sosial sifarişdir və zamanın tələbi olduğunu vurğulayıb: "İnformasiya bolluğuna gətirib çıxaran elmi-texniki tərəqqi, kommunikasiya texnologiyalarının zənginliyinin nəticəsidir. Bununla belə yeni kurikulumların tətbiqində şəxsiyyətin formalaşması və bunun üçün müəllim-şagird münasibətlərinin, ünsiyyətin düzgün formasının tapılması ən mühüm şərtlər sırasındadır. Müəllim tədris etdiyi fənni şagirdə sevdirmək, onda maraq yaratmaq məqsədi ilə öz üzərində işləməklə yeni təlim vasitələrini öyrənməli, daim axtarışda olmalı, yeni ünsiyyət formaları tapmalıdır. Beləliklə yeni təlim metodları, onların hər gün işə tətbiqi müəllimdən çoxlu mütaliə etmək, tədris etdiyi mövzulara yaradıcı yanaşmaq tələb edir. Bu məqsədlə hər bir ibtidai sinif müəllimi daim mütaliə etməli, daha səmərəli tədris üsulları axtarmalı; hər dəfə sinfə yeni bir ideya, yeni bir fikirlə gəlməyə çalışmalıdır. Daim dərs dediyi şagirdlərini də yenilikçi olmağa alışdırmalıdır. Bu zaman yaxşı olardı ki, şagirdlər də öz fikir və düşüncələrini sərbəst ifadə etməyi bacarsınlar”.
Mühazirəçi Azərbaycan Respublikasının təhsil sahəsində islahat proqramı, təhsilin inkişafı üzrə Dövlət strategiyası, Ümumi təhsil pilləsinin dövlət standartları və proqramları, ümumtəhsil sistemində Qiymətləndirmə Konsepsiyası, Təhsil haqqında Azərbaycan Respublikasının Qanunu, Azərbaycan Respublikasında ümumi təhsilin Konsepsiyası (Milli kurikulum) və Bilik Fondunun Nizamnaməsinə uyğun olaraq, gənc nəslə Azərbaycançılıq məfkurəsinin mahiyyətinin çatdırılmasını, hər bir şagirdin müassir standartlara uyğun biliklərə yiyələnməsini əks etdirən sənədlərə dair slaydları dinləyicilərə nümayiş etdirib.  Təşkilatçılıq işinin yüksək səviyyədə baş tutması sayəsində mühazirəçi öz çıxışını günün tələbinə uyğun səviyyədə qura bilmiş və mövzuya dair ayrı-ayrı məqamları dinləyicilərə çatdırıb. Mühazirə, müəllimlər tərəfindən diqqətlə dinlənilib və sonda dinləyiciləri maraqlandıran çoxsaylı suallara mühazirəçi tərəfindən aydınlıq gətirilərək cavablandırılıb.Tədbir iştirakçıları Bilik Fondunun maarifçilik fəaliyyətini yüksək qiymətləndirməklə yanaşı, belə mühazirələrin tez-tez təşkil olunmasının tərəfdarı olduqlarını bildiriblər.
Xeberle.com