Hollivudun ən məşhur aktyorlarından biri, 1998-ci ildə “Ağıllı Uill Hantinq” roluna görə “Oskar” mükafatı qazanmış Robin Uilyams ötən gün gecə saatlarında dünyasını dəyişib.Modern.az xarici mətbuata istinadən xəbər verir ki, aktyorun cəsədi Şimali Kaliforniyadakı malikanəsində aşkar olunub. 63 yaşlı aktyor son illər gərgin iş qrafiki səbəbindən alkoqol və narkotik vasitələrə qurşanmışdı. İyul ayında o bir müddət Minnessota ştatındakı reabilitasiya mərkəzlərindən birində müalicə alıb və dərin depressiyada olub.

Pataloqoantomlar Uilyamsın cəsədini müayinə edərək ölüm səbəbini rəsmən elan edəcək. İlkin versiya kimi isə aktyorun boğulma nəticəsində öldüyü iddia olunur. Onun ölümü ilə bağlı bir çox tanınmışlar, o cümlədən prezident Barak Obama başsağlığı verib.

“O, həyatımıza yadplanetli kimi daxil oldu və insan ruhunun hər bir telinə toxundu”, - deyə Barak Obama bəyan edib.

Xatırladaq ki, 1961-ci il iyulun 21-də Çikaqo şəhərində anadan olan Robin Uilyams həm komik rollar, həm də mürəkkəb dramatik rolların mahir ifaçısı hesab olunurdu. 1987-ci ildə “Sabahın xeyir, Vyetnam” filmi ilə tamaşaçıların rəğbətini və “Oskar” nominasiyasını qazanan aktyor 1990-cı ilə “Ölü şairlər dərnəyi”, 1991-ci ildə “Kral-balıqçı” rolları ilə də “Oskar” nominasiyası qazanmışdı. 1993-cü ildə “Miss Dautfayer”, 1996-cı ildə “Cek”, 1998-ci ildə “Şəfaverici Adams” rolları onun komik aktyor ampluasını daha da möhkəmləndirib. 1 “Oskar”, 5 “qızıl Qlobus”, 2 “Emmi” mükafatı qazanan böyük sənətçi 3 dəfə nikahda olub və özündən sonra 3 övlad yadigar qoyub.