"Hakan Fidan Ankara ilə PKK arasında əlaqələndirici körpüdür”.
Bu sözləri açıqlamasında rusiyalı politoloq Konstantin Kalaçev söyləyib.
O, Ərdoğanın hakimiyyətini gücləndirmək üçün kürdlərdən istifadə etdiyini bildirib:
"Görünür, Kürd Fəhlə Partiyası (PKK) Türkiyədə konstitusiya reformları üçün lazımlı elementdir. Hakan Fidan isə bu işdə əlaqələndirici körpüdür. Ərdoğan öz hakimiyyətini gücləndirmək istəyir. Türkiyəni parlamentli respublikadan prezident respublikasına çevirmək üçün kürdlərlə konsensus vacibdir. Bundan əlavə, yaxın zamanlarda Türkiyədə seçkilər olacaq”.
Qeyd edək ki, Türkiyə Milli İstihbarat Təşkilatının rəhbəri Hakan Fidan bir müddət öncə istefa verib siyasətə gəldiyini desə də, onun bu istəkləri yerinə yetmədi. Baş nazir Davudoğlu və Prezident Ərdoğanın Fidanla bağlı çıxışları onun yenidən Türkiyə kəşfiyyatının rəhbərliyinə qayıtmasına səbəb oldu. Maraqlı məqam isə Fidan bu vəzifədən İmralıda PKK lideri Abdullah Öcalanla danışıqlara gedəcək heyətin tərkibi müəyyənləşdirilən zaman istefa vermişdi. Ekspertlər həmçinin milliyətcə kürd olan Fidandan Ankaranın Öcalanla danışıqlarda istifadə etməyə çalışdıqlarını bildirmişdilər. Üstəlik, Fidan olmadığı dövrdə Qərbdən təzyiqlərin artması onun kəşfiyyata qayıtmasını məqbul etmişdi.
Onu da xatırladaq ki, bu gün ABŞ prezidentliyinə namizədlərdən biri Rand Paul öz çıxışında Kürdüstan dövlətinin yaradılmasının vacibliyini vurğulayıb. Hazırkı dövrdə isə Türkiyə üçün bu, heç arzulanmayacaq məqamdır. (axar.az)
Xəbərdən istifadə edərkən istinad etmək vacibdir.
