Xeberle.com xəbər verir ki, bu barədə "Qafqazinfo”ya müraciət edən Ü. Rəhmanov bildirib ki, o, Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidmətinin "Avtomobil Nəqliyyatı ilə Daşınmaların Təşkili” MMC-nin Göyçay bölməsində aparıcı-mütəxəssis vəzifəsində işləyib: "İşlədiyim müddətdə rəhbərlik tərəfindən xəbərdarlıq və ya töhmət almamışam. Ali təhsilliyəm, ixtisasca nəqliyyatçıyam.

Pandemiya ilə əlaqədar olaraq distant iş rejiminə keçirilmişdim. Lakin "ANDT” MMC-yə yeni təyin olunmuş baş direktor Natiq Dadaşov və onun Göyçay bölməsinə qeyri-rəsmi olaraq təyin etdiyi Əhmədov Rauf Vaqif oğlunun "tələblərinə” cavab vermədiyimə görə mənimlə bağlanmış əmək müqaviləsinə avqustun 17-də xitam verilib. Bu barədə nazirə iki dəfə müraciət ünvanlasam da, heç bir münasibət bildirilməyib. Bildirim ki, 48 yaşım var. Ailəliyəm, iki övladım var. Övladlarımdan biri tələbədir. Bu işdən aldığım əmək haqqı yəni 234 manatla onların tələbatını ödəməyə çalışırdım. İndi isə işsiz qalmışam”.

Ü. Rəhmanovun müraciəti ilə bağlı Dövlət Avtomobil Nəqliyyatı Xidmətinin İctimaiyyətlə əlaqələr üzrə mütəxəssisi Turanə Əkbərova ilə əlaqə saxladıq. O sorğumuza cavab olaraq bildirdi ki, "Avtomobil nəqliyyatı ilə daşınmaların təşkili” MMC-nin fəaliyyətinin optimallaşdırılması məqsədilə tədbirlər aparılıb: "Bununla əlaqədar olaraq bəzi ştat vahidlərinə ehtiyac olmadığı müəyyən olunub. Bu səbəbdən də bir sıra əməkdaşların müqaviləsinin müddəti uzadılmayıb. Yəni hər hansı bir əməkdaş işdən çıxarılmayıb, sadəcə həmin ştata ehtiyac qalmadığı müəyyən olunub.

Ülvi Rəhmanov da həmin əməkdaşlar siyahısındadır. Onun işi ilə bağlı da hər hansı bir nöqsan aşkarlanmayıb. Bu səbəbdən də Ülvi Rəhmanova xəbərdarlıq edilməyib”.