Təəssüf hissi ilə qeyd edirik ki, avqust ayı ərzində Sumqayıtda ardı-arası kəsilməyən yanğın hadisələri baş verir. 4 avqust tarixində "Green House" şadlıq evində, 10 gün sonra "Zirvə" kafesində, 19 avqust tarixində təmirdə olan 36 saylı orta məktəbdə, daha sonra Sumqayıt Dəmiryolu Vağzalında və s. yanğınlar olayların mütəmadi xarakter aldığını göstərir.
Əcəba, havaların həddən artıq isti keçməsi ilə elektrik enerjisinə artan tələbat hər birimizin dolayısı ilə yanğın təhlükəsi riski ilə üz-üzə olduğumuza işarədirmi? Görəsən sözügedən yanğınlar əslində nədən qaynaqlanır?
Məsələ ilə bağlı "Xeberle.com"a təhlükəsizlik məsələləri üzrə ekspert Elmar Nurəliyev danışıb.
Ekspert bildirib ki, yanğın əsas 3 elementin - yanar maddə, oksigen, istilikin birləşməsi ilə baş verir.
Yanğınların müxtəlif maddələrin alışmasından yarandığına diqqət çəkən E.Nurəliyev son zamanlarda baş verən hadisələrin səbəbinin elektrik qısaqapanmaları olduğunu qeyd edib.
"Baş vermiş olayların statistikasına nəzər yetirəndə görürük ki, elektrik qısaqapanmasından baş verən yanğınlar üstülük təşkil edir", - deyə ekspert vurğulayıb.
Elmar Nurəliyev istər obyektlərdə, istər fərdi yaşayış evlərində, istərsə də digər təyinatlı məkanlarda elektrik təsərrüfatının daima saz vəziyyətdə saxlanmasına nəzarət edilməsinin vacibliyini qeyd edib.
Onun sözlərinə görə, çəkilmiş elektrik xətləri norma və standarlara cavab verməli, məkanın elektrik yük götürmə qabiliyyətinə uyğun olmalı, elektrik cizahlarından düzgün istifadə edilməli, kənardan hər hansı müdaxiləyə yol verilməməlidir.
"Təmir işləri yalnız lisenziyalı, akkreditasiyadan keçmiş müəssisə tərəfindən həyata keçirilməlidir", - deyə o bildirib.
Elmar Nurəliyev yalnız önləyici tədbirlər görməklə yanğın zamanı dəymiş zərərin minimuma endirilə biləcəyini sözlərinə əlavə edib.
"Bununla yanaşı obyektin spesifikasına görə könüllü yanğınsöndürmə qrupları olmalıdır. Bu qruplar hər hansı yanğın zamanı bir-biri ilə kordinasiyada olaraq yanğını söndürməyə müdaxilə etməlidir", - deyə o fikrini tamamlayıb.
Aygün İsmayılova
Xəbərdən istifadə edərkən istinad etmək vacibdir.
