Tibbi Ərazi Bölmələrini İdarəetmə Birliyinin (TƏBİB) məlumatına əsasən, hazırda ölkə ərazisində qızılca xəstəliyinə yoluxma halları müşahidə edilir. Bir çoxunuza məlum olduğu kimi, ölkəmizdə qızılca xəstəliyinə son illər ərzində yoluxma nadir hallarda qeydə alınıb, hətta bəzi illərdə ümumiyyətlə, yoluxma olmayıb, ən yüksək yoluxma isə 2018-ci ildə qeydə alınıb. Bu da daha çox 40 yaşdan yuxarı əhali arasında müşahidə olunub və dövlət tərəfindən təqvimdən kənar peyvənd kampaniyalarına başlanılıb.
Hazırda yoluxmalar daha çox məktəb və bağça yaşlı uşaqlar arasında üstünlük təşkil edir. Bu xəstəlik uşaqlıq dövrünün infeksion xəstəliklərindən hesab olunur, virus mənşəli xəstəlikdir və özü sağalan xəstəliklər qrupuna daxildir. Yəni bu, o deməkdir ki, xəstəliyin xüsusi spesifik müalicəsi yoxdur.
Son günlər ərzində qızılcadan həyatını itirən uşaqların sayı 4-ə çatıb.
Bəs, Sumqayıt məktəblərində qızılca xəstəliyi ilə bağlı tədbirlər görülürmü?
Sualımızı Abşeron-Xızı regional təhsil idarəsinin ictimaiyyətlə əlaqələr üzrə məsul şəxsinə yönəltdik. Qeyd edildi ki, Abşeron-Xızı Regional Təhsil İdarəsinin tabeliyində olan bir sıra ümumi təhsil müəssisəsində dezinfeksiya işləri aparılıb: "Həyata keçirilən dezinfeksiya işləri ümumi təhsil müəssisələrinin əsasən, tədris otaqları, dəhliz və sanitar qovşaqlarında aparılıb. Ümumilikdə, Abşeron-Xızı Regional Təhsil İdarəsinin əhatə etdiyi 1 şəhər və 2 rayonun ümumi təhsil müəssisələri təyin olunmuş qrafikə uyğun olaraq dezinfeksiya olunub. Qeyd edək ki, təhsil müəssisələrində sanitar-gigiyenik təmizliyin qorunması və istənilən növ infeksiyanın yayılmasının qarşısını almaq məqsədilə mütəmadi tibbi-profilaktik tədbirlər görülür”.
Elşən Yehyayev
Xəbərdən istifadə edərkən istinad etmək vacibdir.
