Dəfələrlə yol polisinin pusquda dayanaraq gizli şəkildə sürücüləri güdməsi hallarını görmüşük, yaxud eşitmişik. Bu dəfə sözügedən qanunsuz olaya Sumqayıtda rast gəldik. Fotoda gördüyünüz bu yol polisi avtomobillərini Xeberle.com-un əməkdaşı fotoaparatının köməyi ilə "yaxalaya” bilib.
Xatırladaq ki, 9 yanvar 2012-ci ildə Daxili İşlər naziri Ramil Usubovun əmri ilə təsdiq edilmiş «Yol-patrul xidməti haqqında Təlimat»a əsasən patrul avtomobillərini və başqa cihazlarını hər hansı bir maneənin (ağaclar, bina və qurğular, reklam lövhələri və s.) arxasında gizlətmək qadağandır.
Eyni zamanda avtomobili yolun məhdud görüntülü hissələrində dəmiryol keçidləri zonasında, tunellərdə, hərəkət istiqamətində 3-dən az hərəkət zolağı olan körpülər və yol ötürücülərində dayandırmağa da icazə verilmir; arzuolunmaz nəticələrin baş verməsinin qarşısının alınması üçün təxirəsalınmaz dayandırma zərurəti istisnadır.
Əcəba, bu yol polisləri Sumqayıt şəhər, Zülfü Hacıyev küçəsi ilə Üzeyir Hacıbəyov küçələrinin kəsişmə dairəsində - ağaclığın arxasında gizlənərək hansı məqsəd güdürlər? Ümidvarıq ki, onlar peşələrinin vurğunu kimi sadəcə məsləhətləşirlər, işləri ilə bağlı hansısa məsələni analiz edirlər. Qazanc əldə etmək versiyası isə, inanırıq ki, heç kimin ağlına gəlmədi.
Elnur Ağayev
Xeberle.com