"Sumqayıt səhiyyəsinin vəziyyəti mənim seçicilərimlə görüşlərimdə qaldıracağım sosial problemlərdən biri olacaq. Bu, ölkə miqyaslı sistem xətasının bir hissəsi olsa da, Sumqayıtda - mərkəzdən kənarda, məliyyələşmənin və sərmayə qoyuluşlarının nisbətən az olduğu yerdə - problemlər bir çox halda faciələrə yol açır."
Bu sözləri 42 saylı Sumqayıt II seçki dairəsindən deputatlığa namizəd Hafiz Babalı Facebook səhifəsində qeyd edib. O, səhiyyə sistemində mövcud olan digər problemlərdən də söz açıb:
"Bu yaxınlarda Bakı-Sumqayıt şosesində ağır insan tələfatı ilə nəticələnən avtomobil qəzası baş verdi. Xatırlayırsınız - yaralarını qan aparan şəxsləri qanı durdurulmadan xərəyə qoyur, hadisə yerinə gələn tibb işçiləri yaralılara yerində təcili yardım göstərmirdilər.
Bu yaxınlarda Sumqayıt şəhəri Təcili Tibbi Yardım Stansiyasının xanım həkimi və təcili yardım maşınının sürücüsü ilə söhbət etdim. Özümü təqdim etdim, deputatlığa namizəd, jurnalist olduğumu da dedim.
Həkim bildirdi ki, çağırışa gedən həkimlərin tibbi və dərman vasitələri ilə təminatı acınacaqlı vəziyyətdədir. Təchizata cavabdeh şəxsdən norma üzrə tələb dərman vasitələrini almaq çətin məsələdir. Bəzən çağırışlara əliboş getməli olurlar.
Sürücü isə dedi ki, avtomobilin çağırış sistemi işləmir, sıradan çıxan hissələri, hətta motoru belə özü təmir etməli olur. Belə bir durumda həkimdən xəstəyə qayğı və keyfiyyətli tibbi xidmətdən danışmaq yersizdir.
Hörmətli seçicilər! 42-ci Sumqayıt 2-ci seçki dairəsində deputatlığa namizədlərdən biri də çağırışçı-həkimdir. Ümid edirəm ki, o sizlərlə görüşündə (əgər görüşəcəksə) bu məsələlər haqda öz iradlarını paylaşacaq.
Azərbaycan Respublikası Səhiyyə Nazirliyindən və Sumqayıt Icra Hakimiyyetindən bu məsələni diqqətdə saxlamağı xahiş edirəm.
REAL - Respublikaçı Alternativ Hərəkatı ölkədə səhiyyə sistemində mövcud olan problemləri həll həll etmək üçün hökumətdən islahatlara başlamağı və icbari tibbi sığortanın gecikmədən tətbiqini tələb edir.
İcbari tibbi sığorta məsələsində şəxsən mən hesab edirəm ki, aztəminatlı ailələrin sığorta haqları dövlət büdcəsi hesabına təmin olunmalı, digər kateqoriyadan olan ailələrə gəlincə, burada gəlirlərdən asılı olaraq differensial yanaşma tətbiq edilməlidir. Orta səviyyədən aşağı və yuxarı gəlirləri olan şəxslərin sığorta fonduna ödəmələri xüsusi şkala əsasında hesablanmalıdır. Yəni, ödəmə vahid tarif əsasında deyil, gəlirlərə mütənasib olmalıdır."