Azərbaycanda keçirilən parlament seçkilərinin yekun nəticələri artıq bəllidir. Milli Məclisin yeni tərkibində hazırki deputatlarla yanaşı ilk dəfə mandat alanlar da var. Belə ki, parlamentin payız sessiyasında 27 yeni deputat işə başlayacaq və bu, qanunverici orqanın 22 faiz yenilənməsi deməkdir.

Sumqayıtda mövcud olan 4 seçki dairəsindən seçilən deputatların ikisi ilk dəfədir ki, qanunverici orqana mandat alır. Bunlar 41 saylı Sumqayıt I seçki dairəsindən deputat seçilən Mirzəcan Xəlilov və 42 saylı Sumqayıt II seçki dairəsindən millət vəkili statusu qazanan Tahir Mirkişilidir. M. Xəlilov dairənin hazırki deputatı Leyla Abdullayevanı, T. Mirkişili isə Musa Qasımlını əvəzləyib.

Yeni deputatları tanıyaq:

Mirzəcan Mirzəmməd oğlu Xəlilov - Yeni Azərbaycan Partiyasının üzvü olan Mirzəcan Xəlilov 1954-cü ildə Sabirabad rayonunda anadan olub. Azərbaycan Politexnik İnstitutunun (indiki Texniki Universitet) inşaat fakültəsinə daxil olub, 1974-1976-cı illərdə isə ordu sıralarında xidmət keçib.

Daha sonra ali təhsilini qiyabi olaraq Azərbaycan İnşaat Mühəndisləri İnstitutunda davam etdirib.

Əmək fəaliyyətinə inşaatçı kimi 1977-ci ildə doğma Sabirabad rayonunda "Muğanmeliosutukinti” Trestinin 10 saylı səyyar mexanikləşdirmə dəstəsində başlayıb. Əvvəlcə fəhlə, sonra isə briqadir işləyib.

1979-cu ildə ali təhsilini çay qurğularının və su elektrik stansiyalarının hidrotexniki tikintisi ixtisası üzrə başa vuran M. Xəlilov "Azərkəndsutəchizattikinti” İstehsalat Birliyinin 20 saylı səyyar mexanikləşdirmə dəstəsində hidrotexnik-mühəndis kimi əmək fəaliyyətinə davam edib.

Daha sonralara vəzifə pillələrində irəliləyən M.Xəlilov 2003-cü ildə mülkiyyət formasını dəyişərək "Azərsutəchizattikinti” ASC kimi fəaliyyətini davam etdirən bu quruma sədr təyin olunub.

M.Xəlilov 1997-ci ildə Füzuli rayonunun işğaldan azad edilmiş 22 yaşayış məntəqəsinin içməli su ilə təchizatına rəhbərlik edib. M.Xəlilovun rəhbərlik etdiyi təşkilat ölkə rəhbərliyinin tapşırığı ilə sonralar Biləsuvar və Füzuli rayonlarının ərazilərində köçkün qəsəbələrin salınmasında da fəal iştirak edib.

Hazırda ölkə rəhbərliyinin tapşırığı ilə Azərbaycanın 52 şəhər və rayonunda su təchizatı və kanalizasiya sistemlərinin yaradılması layihələri həyata keçirilir. "Azərsutəchizatikinti” ASC də podratçı təşkilat olaraq bu işlərin önündə gedir.

Mirzəcan Xəlilov həm də YAP Sabirabad rayon təşkilatı idarə heyətinin üzvü, mərhum prezident Heydər Əliyevin həyat və fəaliyyətinin ayrı-ayrı məqamlarından bəhs edən "Xalqa bağışlanan ömür” kitabının tərtibçisidir.

2014-cü ilin aprelində Prezident İlham Əliyevin imzalıdığı sərəncamla "Azərsutəchizattikinti” ASC-nin sədri Mirzəcan Xəlilov "Əməkdar mühəndis” fəxri adına layiq görülüb.

Tahir Famil oğlu Mirkişili – 1977-ci ildə Azərbaycanda ziyalı ailəsində anadan olmuşdur. 1994-cü ildə Bakı şəhərində Fizika-Riyaziyyat və İnformatika təmayüllü liseyi bitirmişdir. Riyaziyyat fənni üzrə Azərbaycan Olimpiada Komandasının üzvü olmuşdur. 1994-cü ildə Azərbaycan Dövlət İqtisad Universitetinin Beynəlxalq İqtisadi Münasibətlər fakültəsinə daxil olmuşdur. 1997-ci ildə Azərbaycan Respublikası Təhsil Nazirliyi tərəfindən keçirilən ali təhsil müəssisə tələbləri arasındakı Ümumrespublika İqtisadiyyat Olimpiadasında 1-ci yeri tutmuşdur. 2000-ci ildə magistr pilləsini fərqlənmə diplomu ilə bitirərək "beynəlxlq iqtisadçı” magistr dərəcəsi almışdır.

2004-cü ildə ABŞ-ın Stanford Universitetinde İKT İqtisadiyyatının idarəedilməsi üzrə ixtisaslaşmış proqramı bitirmişdir. 2006-cı ildə "Azərbaycan Respublikasının xarici ticarət siyasəti və onun təkmilləşdirilməsi yolları" mövzusunda namizədlik dissertasiyasını uğurla müdafiə edərək, iqtisad elmləri üzrə fəlsəfə doktoru alimlik dərəcəsi almışdır.

 1998-ci ildə Azərbaycan Resublikası Xarici İqtisadi Əlaqələr Nazirlyində Ümumdünya Ticarət Təşkilatı üzrə mütəxəssis, 2000-2006-cı illərdə Azərbaycan Dövlət İqtisad Universitetində "Dünya İqtisadiyyatı” fənni üzrə müəllim, 1999-2011-ci illərdə özəl sektorda İnformasiya Kommunikasiya Texnologiyaları sahəsində müxtəlif vəzifələrdə çalışmışdır. 2011-ci ildə Azərbaycan Respublikası İqtisadi İnkişaf nazirinin müşaviri təyin edilmişdir. 1-ci dərəcəli dövlət qulluqçusudur. 2014-cü ildən Azərbaycan Dövlət İqtisad Universitetində Dövlət Attestasiya Komissiyasının sədri, Azərbaycan Milli Elmlər Akademiyasının İnnovasiya Şurasının üzvü seçilmişdir.

2012-ci ildə informasiya kommunikasiya texnologiyaları sahəsində xidmətlərə görə Azərbaycan Prezidenti tərəfindən "Tərəqqi” medalı ilə təltif olunmuşdur.

"Heydər Əliyev Mərkəzi” ,"ASAN Xidmət”, "Elektron İmza”, "Elektron Hökumət”, "Elektron Təhlükəsizlik”, "Elektron Təhsil”, "Made in Azerbaijan” kimi uğurlu layihələrin həyata keçməsində bilavasitə iştirak etmiş, dünyada vaş verən mühüm yeniliklərin Azərbaycana gətirilməsində mühüm rol oynamışdır.

2005-2010-cu illər ərzində ABŞ, Böyük Britaniya, Fransa, Almaniya, Yaponiya, Sinqapur, Cənubi Koreya, İspaniya, Malayziya kimi olkələrin innovativ iqtisadi modellərini araşdırılması ilə məşğul olmuşdur.

1 kitabın və 10 elmi məqalənin müəllifidir.

İngilis və rus dillərini, Türkiyə türkcəsini sərbəst bilir. ABŞ, Yaponiya, Almaniya, Fransa, Böyük Britaniya, İsveçrə, Avstriya, Rumıniya, Çexiya, Slovakiya, Türkiyə, Rusiya, Gürcüstan, Ukrayna kimi ölkələrdə təşkil edilmiş seminar və konfransların, işgüzar görüşlərin iştirakçısı olmuş və məruzələrlə çıxış etmişdir.

Yeni Azərbaycan partiyasının üzvüdür.
Seçici bu dəfə də onlara etimad göstərdi
43 saylı Sumqayıt III seçki dairəsinə və 44 saylı Sumqayıt-Xızı seçki dairsəinə gəldikdə isə bu dairələrdən deputat seçilənlər yeni deyil. Belə ki, Muxtar Babayev və Hacı Salayev hazırda Milli Məclisin deputatlarıdır. Sumqayıt seçiciləri ikinci dəfədir ki, bu şəxslərə etimad göstərərərək millət vəkili seçiblər.

Onlarla da yaxından tanış olaq.

Muxtar Bahadur oğlu Babayev - 1967-ci ildə Bakı şəhərində anadan olub. 1984-cü ildə Bakı şəhərində orta məktəbi bitirmişdir. M.V.Lomonosov adına Moskva Dövlət Universitetinin fəlsəfə fakültəsinin, Azərbaycan Dövlət İqtisad İnstitutunun və Ümumrusiya Xarici Ticarət Akademiyasının məzunudur.1986-1988-ci illərdə hərbi xidmətdə olub. Əmək fəaliyyətinə 1991-ci ildə Azərbaycan Respublikası Dövlət İqtisadiyyat və Planlaşdırma Komitəsində başlayıb. 1992-1994-cü illərdə Xarici İqtisadi Əlaqələr Nazirliyinin idarəsində rəis müavini, rəis, 1994-2003-cü illərdə Azərbaycan Respublikası Dövlət Neft Şirkəti Xarici İqtisdai Əlaqələr İdarəsində şöbə müdiri, rəis müavini, 2003-2006-cı illərdə Azərbaycan Respublikası Dövlət Neft Şirkəti Marketinq və İqtisadi Əməliyyatlar İdarəsində rəis müavini, sonradan rəis, 2007-2010-cu illərdə isə Azərbaycan Respublikası Dövlət Neft Şirkətinin Ekoloji məsələlər üzrə vitse-prezidenti vəzifələrində çalışıb.

2010-cu ildən Azərbaycan Respublikası Dövlət Neft Şirkəti "Azərikimya" İstehsal Birliyinin Müşahidə Şurasının sədri vəzifəsində çalışır.

7 noyabr 2010-cu ildə keçirilmiş parlament seçkilərində 43 saylı Sumqayıt üçüncü seçki dairəsindən IV çağırış Azərbaycan Respublikası Milli Məclisinin deputatı seçilmişdir 7 dekabr 2010-cu ildə Milli Məclisin Təbii ehtiyatlar, energetika və ekologiya komitəsinin üzvü seçilib.

Yeni Azərbaycan Partiyasının üzvüdür.

Hacı Hacı-Baba oğlu Salayev - 28 iyun 1968-ci ildə Sumqayıt şəhərində anadan olub. 1975-1985-ci illərdə Bakı şəhəri 6 saylı orta məktəbdə təhsil alıb. Azərbaycan Xalq Təsərrüfatı İnstitutunun Plan-iqtisad fakültəsini və Bakı Dövlət Universitetinin hüquq fakültəsini bitirib.

1985-ci ildən Azərbaycan Dövlət İdman Komitəsi "İdman” İstehsalat Birliyində fəhlə kimi əmək fəaliyyətinə başlamış, sonradan əmtəəşünas və iqtisadçı vəzifələrində çalışıb.

1986-1988-ci illərdə Sovet Ordusu sıralarında həqiqi hərbi xidmətdə olub.

1991-1996-ci illərdə Hədiyyələr və Bədii Məmulat üzrə Xalq Yaradıcılığı İstehsalat birliyinin "Şəbəkə” filialının direktoru vəzifəsində çalışıb. Daha sonra Azərbaycan Respublikası Prezidenti yanında Xüsusi İdarədə (Hərbi Əks-Kəşfiyyat Xidməti, Milli Təhlükəsizlik Nazirliyi) həqiqi hərbi xidmətdə olub. Xidmət etdiyi müddət ərzində əməliyyat müvəkkilindən şöbə rəisi vəzifəsinədək ucalıb.

Ehtiyyatda olan polkovnik rütbəli zabitdir.

Ehtiyyata buraxıldıqdan sonra "TRUST” Mühafizə Şirkətinin Baş direktoru, İdarə Heyətinin Sədri vəzifəsində, sonra isə Azərbaycan Respublikası Dövlət Neft Şirkəti Prezidentinin Təhlükəsizlik məsələləri üzrə müşaviri və Təhlükəsizlik Departamentinin rəisi vəzifələrində işləyib.

29.11.2010-cu il tarixdən Dördüncü Çağırış Azərbaycan Respublikasının Milli Məclisinin Deputatıdır. Milli Məclisin Təhlükəsizlik və Müdafiə Komitəsinin üzvüdür. Milli Məclisin Bolqarıstan, Estoniya və Türkiyə parlamentləri ilə əlaqələr üzrə işçi qrupunun üzvüdür. 2012-ci ildən Azərbaycan-Peru Parlamentləri ilə əlaqələr qrupunun rəhbəridir.

2011-ci ilin aprel ayında Müstəqil Dövlətlər Birliyi Parlament Assambleyasının Hüquq Məsələləri Daimi Komissiyasının sədr müavini seçilib və hal-hazıradək həmin vəzifəni tutur.

2015-ci ilin aprel ayında Müstəqil Dövlətlər Birliyi Parlament Assambleyasının Şurası tərəfindən "Parlament əməkdaşlığının möhkəmləndirilməsinə görə” Medalı ilə (Медаль «За укрепление парламентского сотрудничнства») təltif edilmişdir.

Azərbaycan Milli Elmlər Akademiyasının İqtisadiyyat İnstitutunun dissertantıdır.

Xeberle.com