Sumqayıtda Heydər Əliyevin adını daşıyan parkda nəhəng Heydər Əliyev Mərkəzi inşa olunur.

Xeberle.com-un məlumatına görə, layihə əsasında tikilməkdə olan Mərkəzdə ümummilli lider Heydər Əliyevin həyat və fəaliyyətinin müxtəlif dövrlərini əks etdirən fotolar və eksponatlar yer alacaq. Burada dünyanın nüfuzlu siyasətçilərindən olan Heydər Əliyevin Azərbaycanın beynəlxalq aləmdə nüfuzunun möhkəmləndirilməsi, bu böyük şəxsiyyətin həyata keçirdiyi məqsədyönlü siyasət nəticəsində müstəqilliyinin ilk illərində ölkəmizdə vətəndaş müharibəsinin qarşısının alınması, iqtisadiyyatın ağır böhrandan inkişaf yoluna çıxarılması, güclü ordu quruculuğu istiqamətində həyata keçirilən mühüm tədbirləri əks etdirən foto, kitab və digər vəsaitlərə geniş yer veriləcək.

Mərkəzin özəlliyini artıran mühüm amillərdən biri də o olacaq ki, Burada interaktiv məlumat tablolarına geniş yer veriləcək. Mərkəzdə H. Əliyevin xatirəsinin əbədiləşdirildiyi muzey də yaradılacaq. Bina 4 mərtəbədən ibarət olacaq. Mərkəzdə gənclər üçün müzakirə və diskussiya zalları, elektron kitabxana da olacaq. Möhtəşəm görünüşü ilə hər kəsi heyran edəcək mərkəzdə linqafon, internet və rəssamlıq otaqları, fotostudiya və rəqs zalı da yaradılacaq.
Xeberle.com