Elə gün olmur ki, bu ölkədə adamın durduğu yerdə başına nəsə bir hadisə gəlməsin. İnsan ha mərdimazardan, xətadan uzaq durmağa çalışsa da, mərdimazarın özü gəlib adamı tapmasa, dincəlmir. Təəssüf ki, belə mərdimazarlığı indi dövlətin öz balaca qulluqçuları vətəndaşlara qarşı etməkdədir. Söhbət yol polisi və onların işbirlikçisi "Evakuasiya.Az” MMC şirkətindən gedir. Özü də bu mərdimazarlığı insana durduğu yerdə də yox, yatdığı yerdə edirlər. Belə ki, ötən gün, səhəri açıb, pəncərəmdən baxanda görürəm ki, aylardır axşamlar saxladığım maşınım öz yerində deyil. Maşının kasko sığortası olduğundan oğurluq hadisəsi belə olsa, küçədə qoymaqdan heç vaxt narahat olmamışam.
Ayrıca, statistikalardan da görmək olur ki, əksərən sovet istehsalı maşınlar asan oğurlanır. Ağlıma bir versiya gəldi ki, maşın cərimə meydançasına aparılıb. Düzü Sumqayıtda çox nadir hadisədir bu. Amma yəqin ki, "büdcəni doldurmaq lazımdır” dedi-qodularından sonra artıq Sumqayıtda da normallaşacaq. Yaxşı, aparıb aparıb. Amma mən ki maşını qadağan olunmuş yerdə saxlamamışam. Bu küçədə "parkinq yasaqdır” işarəsi yoxdur axı! Mərdimazarlara dua edə-edə, düşürəm yollara.
Bilməyənlərə deyim ki, Sumqayıtda cərimə meydançası "Əşya Bazarı” tərəfdədir, hansı taksiyə yaxınlaşsanız, sizi aparacaqlar. Elə cərimə meydançasının qabağında yığılmış insanlardan başa düşmək olur ki, bu günə tərs başlayan tək mən deyiləm. Onlarla adam, əsəblə, söyüşlə, qarğışla haqqını tələb edir. Dəmir hasarın qarşısındakı insan isə "evakuator pulunu”. Bilmirəm, o gün əmr kimdən, hansı ağlın sahibindən gəlmişdi amma cibimizə girib qazancımızdan əyri yolla pay qoparmaq əməliyyatının təşkilatçı və iştirakçıları yol-polisi və evakuasiya şirkəti idi.
Deməli sistemi belə qurublar - harda gəldi, bəli, haqlı-haqsız yerdən yığdıqları maşınlar YPX inspektorunun sifarişi əsasında Evakuasiya.az MMC-nin (156) maşını ilə cərimə meydançasına gətirilir. Əvvəlcə DYP-də məsələ aydınlaşdırılır. Daha sonra DYP-dən verilən kağızla Cərimə Meydançasına gedilir, ora da evakuasiya xidmət haqqı ödənilir və maşın götürülür.
Problem isə burada başlayır. Əgər sənin maşının haqsız yerə evakuasiya olunubsa, evakuator pulunu kim ödəməlidir? Pul məndən tələb olunduğu an, 156 qaynar xəttə zəng edərək məsələni dəqiqləşdirirəm, və telefonda mənə Təranə, Nadir və s. kimi şəxslər qəti şəkildə bildirirlər ki, göstərilən xidmətin qarşılığı olan 20 AZN ödənilməlidir.
Sual isə budur ki, mən görmədiyim xidmətin qarşılığını niyə ödəməliyəm? Axı mən 156-dan evakuasiya xidməti tələb etməmişəm! Düşünün gecə yatır, səhər oyanırsız ki, kimsə sizin maşınınızı oğurlayıb aparıb hansısa bir yerə salıb, sonra deyir ki, bir səhvdir olub, gedin götürün maşınınızı, və getdiyiniz yerdə, digər şəxs deyir ki, mən sizin maşınınızı götürüb gətirmişəm, mənə 20 manat ver. Bu korrupsiya deyil mi? Ümumiyyətlə, bu mövzuda özünü "Siqnal İdarəsinin əməkdaşı kimi təqdim Aydın adlı şəxs deyir ki, hər gün eyni şeyləri yaşayır. Bütün günü, söyüş, qarğış eşitməkdən evinə gec gedir ki, bütün bu mənfi enerjini ailəsinə aparmasın. Özü də and-aman edir ki, ona bir qəpik də çatmır. Bu qədər qarğışın da bir təsiri olmadığını deyib gülüşürük. Aydının dediyinə görə ödənilən 20 AZN-nin çeki də verilir və çek 156 xidmətinə aiddir.
Zatən, telefon danışıqlarımızda şirkət operatoru da təsdiq etmişdi. Məsələni isti-isti rəsmən şikayət etmək cəhdim də uğursuz alınır. Belə ki, 195-2 (İqtisadi İnkişaf Nazirliyi) xidməti məsələyə DİN-in baxdığını, 902 xidmətinin 102-yə şikayət etməli olduğumu bildirir. 102 xidməti isə ümumiyyətlə dayanmadan məşğul olduğunu deyir avtomatik cavabda.
Yanımızda adam öldürsələr, basqın olsa, hadisə baş versə, deməli öz başımızın çarəsinə baxmalıyıq. Təəssüf ki, bu cür xaos ortamları yarandıqca, insanlarda qəzəb artır. Sistem ədaləti təmin etmədikcə, insanlar öz ədalət anlayışlarını əvvəlcə öz çevrələrində tətbiq edir, sonra da yaymağa başlayır. Bu isə nəhayət sistemlə qarşıdurmaya gətirib çıxardır. Mən, səbrli insanam, tutaq ki, dözdüm, tüpürdüm, söydüm, sakitləşdim, it aparan olsun dedim. Amma hər şeyin bir limiti var. Səbrli insanların da sayı tükənəcək. Acıqlı insana çevriləcəklər. Əvvəlcə bu cür şirkətlərdən, sonra da sistemin özündən intiqam alacaqlar…

Əfqan, xeberle.com