Dərin idrak sahibləri xalqın, millətin gələcəyini məhz onun təhsilində, mədəniyyətində görüblər. Naqis adamlar isə bir milləti məhv etmək, yer üzündən silmək istəyəndə həmin milləti elmsiz, biliksiz, savadsız görmək istəyiblər. Gənclik şəhəri Sumqayıt həm də yaradıcı, qurucu, ziyalılar şəhəridir,- desək,- yanılmarıq. Şəhərimizin yaşı çox olmasa da, ölkəmizə təhsil sahəsində verdiyi tövhələrin sayına görə heç də qədim yaşayış məskənlərindən geridə qalmır. Əksinə, hər zaman, bütün sahələrdə olduğu kimi, təhsildə də öncüllər sırasındadır. Bunun ən başlıca səbəblərindən biri isə kadrların düzgün yerləşdirilməsindədir. Uzun müddət təhsil sahəsində çalışdığım üçün tam səmimiyyətlə deyə bilərəm ki, lap əvvəldən Sumqayıt şəhər TŞ- nə sayseçmə şəxsiyyətlər, təhsil biliciləri, şəhərdə və respublikada kifayət dərəcədə tanınmış hörmətli insanlar başçılıq etmiş, Sumqayıt təhsilini birincilər cərgəsinə çıxarmışlar. Həmin adamlar haqqında çoxlu danışmaq, xeyli yazmaq olar. Vaxt gələcək, sumqayıtlılar onlara heykəl qoyacaqlar. Mən onu,- Teymur Səmədovu,- hələ 15 nömrəli tam orta məktəbdə təlim-tərbiyə işləri üzrə direktor müavini vəzifəsində işləyəndən tanıyıram. Öz sözünü və yerini bilən, pedoqoji cəhətdən savadlı, dürüst, son dərəcə səmimi bir insan kimi hamının hörmətini qazanmışdı. Təhsil sahəsində çox zaman fikirlərimiz üst-üstə düşürdü. İşgüzarlığı və tələbkarlığı onu 4 nömrəli tam orta məktəbə rəhbər vəzifəsinə gətirdi. Teymur müəllim iki ildə həmin məktəbdə xeyli dəyişiklər edərək özünü fəal bir məktəb direktoru kimi göstərdi. Onun bu xüsusiyyətləri şəhərimizin yeni rəhbərliyinin nəzər-diqqətindən yayınmadı. Uzun müddət başsız qalan TŞ-nə müdir təyin etmək üçün Teymur Səmədovun namizədliyini dəstəklədi. Qısa zaman kəsiyində bütün məktəblərdə bir dirçəliş başladı. Hamı öz işini keçmiş ənənələrə əsaslanaraq müasir tələblərə uyğun qurmağa başladı. Çünki, artıq hamıdan yalnız öz işinə görə hesabat tələb olunur, şagird və müəllimlər məktəbdən kənar işlərə sövq edilmir. Bu yaxınlarda (16-20 dekabr 2015) Sumqayıt şəhər məktəblərində işləyən müəllimlərin mütəşəkkil şəkildə Diaqnostik Qiymətləndirmədə iştirak etmələri bir daha sübut etdi ki, təhsilimiz etibarlı əllərdədir. Hər hansı bir binanın özülünü-bünövrəsini bacarıqlı mütəxəssislər qoyubsa, həmin binanı tikən bənnalar onun divarlarını əyri tikə bilməzlər. İnanırıq ki, Sumqayıt təhsili öz bünövrəsinin üzərində möhkəm dayanaraq irəliləyəcək və daima inkişaf edəcəkdir.

Faiq Bayramov, 9 nömrəli tam orta məktəbin Təlim-tərbiyə işləri üzrə direktor müavini