Bir neçə aydır ki, Sumqayıtda bir neçə istiqamətdə yenilənmə, tikinti quraşdırma işləri həyata keçirilir. Bütün bunların fonunda şəhər rəhbərliyinin atdığı addımlar, verdiyi qərarlar xüsusi maraq yaradır, diqqət cəlb edir. Belə ki, icra başçısı Zakir Fərəcov bir müddətdir ki, sənədi olmayan, qanunsuz tikilən obyektlərin sökülməsi ilə bağlı tapşırıq verib. Bunun nəticəsində artıq Sumqayıtın bir neçə nöqtəsində qanunsuz, sənədsiz obyektlər sökülüb. Bu işlərin davam etdirilməsi gözlənilir. Memarlıq və Şəhərsalma İdarəsinin indiyə qədərki yarıtmaz fəaliyyətinin, verdiyi yanlış qərarların nəticəsidir ki, indi şəhərdə sənədsiz, memarlıq və şəhərsalma prinsiplərinə zidd tikilən onlarla obyekt mövcuddur. Amma görünür icra başçısı bütün bunlarla ciddi şəkildə mübarizə apramaqda və Sumqayıtı müasir şəhər standartlarına qaldırmaqda çox istəklidir.Prezident İlham Əliyev Sumqayıta səfərləri zamanı dəfələrlə şəhərin Bakı standartlarına çatdırılmasının, tezliklə müasir, abad bir şəhərə çevrilməsinin zəruriliyini vurğulayıb: "Sumqayıt gələcəkdə Cənubi Qafqazın ən böyük sənaye mərkəzlərindən biri, dünya miqyasında ən böyük sənaye mərkəzlərindən biri olmalıdır, eyni zamanda, ekoloji cəhətdən tam təmiz, insanlar üçün rahat, gözəl, abad bir şəhər olmalıdır. Sumqayıtın təbiətini, dənizə çıxışını nəzərə alaraq şəhər geniş miqyasda sənaye, turizm, mədəniyyət, istirahət mərkəzi olmalıdır. Bax mən Sumqayıtı belə görürəm”, - deyə ölkə başçısı bildirib.
Sumqayıtda son həftələrin daha bir xüsusi əhəmiyyət daşıyan qərarı Sülh küçəsi ilə bağlıdır. Belə ki, Sülh küçəsinin təmirinə başlanılanda - yolun şəhərin girəcəyindən "Göyərçin” abidəsinədək hər iki tərəfdən 5 metr genişləndirilməsi qərarı veriləndə, küçə boyunca avtomobillərin dayandırılmasına da qadağa qoyuldu. Şəhər rəhbəri bu addımını şəhərin əsas küçəsində sıxlığın olmaması, küçənin daha səliqəli, rahat və geniş – bir sözlə 30 il əvvəlki qiyafəsinə qaytarmaq niyyəti ilə izah edib. Amma bu qərar bir qisim sakinlər tərəfindən heç də birmənalı qarşılanmayıb. Belə ki, həm mərkəzi küçələrdə yaşayan sakinlərin, həm də şəxsi avtomobili ilə mərkəzdə alış-veriş edən sumqayıtlıların narazılıqları yaranıb. Səbəb çox sadədir. Qərarın ardınca xüsusən Sülh küçəsi, həmçinin Heydər Əliyev prospekti, Nəriman Nərimanov və 20 Yanvar küçələrində yerləşən məhəllə və mikrorayonların həyətləri əsl avtomobil dayanacağına çevrilib. Bu da həyətlərdə boş yerin qalmaması, narahat gediş-gəlişə, uşaqların oynamaq üçün boş meydançaların qalmamasına gətirib çıxarıb. Sakinlər narazılıq etdiyindən artıq bəzi həyətlərin girişlərində avtomobillərin daxil olub park edilməməsi üçün taxta, dəmir dirəklər vurulub. Hətta bu yaxınlarda həmin həyətlərdən birində avtomobilin uşağı vurması xəbəri də yayıldı, xoşbəxtlikdən uşaq sağ qaldı. Problem bununla bitmir. Həyətlərin avtomobillərlə "dolması” yanğın təhlükəsizliyi ilə bağlı ciddi həyəcan siqnalı verməlidir. Belə ki, bu ərazilərdə istənilən fövqəladə hal, tutalım, yanğın baş verən zaman girişlər qapalı olduğundan yanğınsözndürən maşınların daxil olmasına böyük əngəllər yaranacaq və bu da istər-istəməz bədbəxt hadisənin miqyasının böyüməsinə rəvac verəcək.
Sual olunur, nə üçün bu ərazidə yeraltı, yaxud yerüstü dayanacaq fəaliyyət göstərmir. Mövcud problem bu ərazidə avtodayanacağın tikilməsi məsələsini qaçılmaz edir. Bəs niyə icra hakimiyyəti bu istiqamətdə hansısa addım atmır?
Məsələ ilə bağlı Sumqayıt Şəhər İcra Hakimiyyətinə müraciət etdik. Qurumdan Xeberle.com-a bildirdilər ki, həqiqətən də sözügedən ərazidə narazılıq var: "Biz şəhərin baş planına əsasən hərəkət edirik və baş plana uyğun olmayan, həmçinin sənədsiz, qanunsuz obyektlər söküləcək. Həmin ərazilərdə avtodayanacaq tikiləcək. Artıq tikilinin planı, eskizi də mövcuddur.”
Göründüyü kimi şəhər icra hakimiyyəti bu işdə israrlıdır.
Xatırlayırsınızsa, şəhərin Mərkəzi univermağının qarşısı vaxtı ilə avtodayanacaq olmuşdur. Hal-hazırda isə orada "Cavid" ticarət mərkəzi fəaliyyət göstərir. İcra hakimiyyətinin açıqlamasını nəzərə alsaq, həmin ərazinin əvvəlki görkəmə qaytarılması və avtodayanacağın yenidən bərpa edilməsi ehtimal olunur.
Xeberle.com
Xəbərdən istifadə edərkən istinad etmək vacibdir.
