Son vaxtlar Sumqayıt Şəhər Məşğulluq İdarəsindən saysız-hesabsız şikayətlər eşidilir. Bu da təsadüfi deyil. Şəhərin bir çox idarə və təşkilatlarında bir çox ixtisarların aparılması , bir qisim dövlət müəsissələrinin bağlanması üzündən bu idarəyə üz tutanların sayı çoxalıb.
Qanuna görə məşğulluq idarəsində qeydiyyata duranlar qismən də olsa, işlə təmin edilməlidirlər. İdarənin iş axtaranlar üçün hazırlanmış boş iş yerləri üçün elanlar siyahısında özlərinə uğyun iş tapa bilməyənlər ümidlərini işsizlik statusu aldıqdan sonra alacaqları müavinətə bağlayırlar. Müavinət almaq üçün müraciət edənlər idarənin məsul işçiləri tərəfindən əsassız olaqar müxtəlif bəhanələrlə get-gələ salınmaqdan cana yığıldıqlarını bildirirlər.Nazirliyə və Sumqayıt Şəhər İcra Hakimiyyətinin qaynar xəttinə, şəhər rəhbərliyinə, şəhərin məşğulluq idarəsindəki süründürməçilik və fırıldaqçılıqla bağla müxtəlif sayda şikayət edilib. Heydər Əliyev Fondunun prezidenti Mehriban Əliyevaya məktubla müraciət edənlər də var.
Yüksək instansiyalara müraciət edən bir neçə nəfərin şikayətlərinə baxılsa da, bir çoxları hələ də bürokratik əngəlləri yara bilməyiblər.
Məsələ ilə bağlı Sumqayıt şəhər sakini A.Əliyeva tərəfindən redaksiyamıza şikayət daxil olub. Şikayətçi bildirir ki, AMİ Sumqayıt filialı bağlandıqdan sonra ötən ilin sentiyabr ayından mən bir neçə nəfər iş yoldaşlarımla bərabər idarədə qeydiyyata durduq. Bizə təqdim edilən vakansiyalarda ixtisas və bacarığımza uyqun gələn iş tapa bilmədik. Müavinət üçün idarənin işçisi Cəfər Ağayevə müraciət etdik. Bildirdi ki, gedin özünüzə iş axtarın. Keçmiş iş yerinə necə düzəlmisiniz, elə də gedin iş tapın, düzəlin.
Dəfələrlə idarəyə "ayaq döydük”. Hər dəfə müxtəlif bəhanələr söyləyərək bizi yola salırdılar. Ötən ilin noyabr ayında C.Ağayev bizə bildirdi ki, bu il növbədə duranlar çoxdur. Gedin gələn il gələrsiniz, baxarıq. Bu ilin yanvar ayında tələb edilən bütün sənədləri qaydası üzrə hazırlayıb idarəyə təqdim etdik. Qanunla fevral ayından gec olmayaraq biz müavinat almalı idik. Amma hər dəfə müraciət edəndə eyni sözü söylədilər. Gedin, biz müavinəti növbə ilə veririk. İdarədə olarkən adını söyləməyən Sumqayıt sakini bizə bildirdi ki, məni bir ildən çoxdur ki,süründürürlər. Mənə deyiblər ki, müavinətin üç ayını onlara versək, növbəmi qabağa salacaqlar. Əsasən 200 manatdan çox müavinat alanlara üstünlük verirlər.
Çünki onların üç aylıq müavinəti böyük məbləğ təşkil etdiyinə görə, idarənin məsul işçilərinin maddi maraqlarını təmin edir.
A. Əliyeva onu da qeyd edir ki, ölkədə korrupsiyaya qarşı ciddi mübarizə aparıldığı barədə yüksək rütbəli dövlət məmurları hesabat verirlər. Amma burada isə...
Məsələ ilə bağlı məşğulluq idarəsinin adı hallanan işçisi Cəfər Ağayevə müraciət etdik. C.Ağayev bildirdi ki, Sumqayıt şəhərində işsizlərin sayı çoxdur: "Təkcə bir təşkilatın 2 minə yaxın işçisi qeydiyyatdadır. Bizə ayrılan vəsaitlə hamının müavinətini vermək imkanımız yoxdur”, - deyə o bildirib.
Ümidvarıq ki, əlaqədar qurumların məsələyə operativ müdaxiləsi nəticəsində problem tez bir zamanda həllini tapacaq.
Xeberle.com
P.S. Xatırladaq ki, aprelin 7-də Prezident İlham Əliyev "Əhalinin özünü məşğulluğunun təmin olunması sahəsində əlavə tədbirlər haqqında” sərəncam imzalayıb. Sərəncama əsasən, əhalinin özünüməşğulluğuna kömək göstərilməsi üçün 2016-cı il dövlət büdcəsində nəzərdə tutulmuş prezidentin ehtiyat fondundan Əmək və Əhalinin Sosial Müdafiəsi Nazirliyinə 6 milyon manat ayrılıb. Amma Sumqayıt şəhər Məşğulluq İdarəsindən isə pulun az ayrılmasından, hamıya çatmamasından gileylidirlər...