Artıq bir müddətdir ki, sosial şəbəkələr insanların xoş günlərini, kədərini bölüşmək üçün üz tutduqları ilk ünvan olub. Hətta məzar daşı ilə selfi çəkənlər, qəbiristanlıqda olduğunu "chek-in” edənlər belə var.
Haqlı olaraq, bu hal sosial şəbəkə istifadəçiləri tərəfindən qınağa səbəb olub. Onların fikrinə görə, insan valideynini, övladını, sevdiyi bir şəxsi itirəndə sosial şəbəkədə nəsə paylaşmaq, xüsusilə də yas yerində, qəbir başında fotolar çəkdirmək halında olmur.
Bəs görəsən dini baxımdan qəbir daşı ilə şəkil çəkdirmək düzgündürmü?
Sualımıza cavab tapmaq üçün Xeberle.com olaraq Sumqayıt Cümə Məscidinin axundu Hacı Rauf Sərdarov ilə əlaqə saxladıq. R.Sərdarov bildirdi ki, dinə görə ümumiyyətlə qəbirə daş qoymaq qəbul edilmir:
"Dində qəbir daşı qoyulması bəyənilməyən bir əməldir. İstisna insanlara qəbir daşı qoyula bilər (dövləti, milləti üçün çalışanlara, şəhidlərə və s.). Digər insanlar üçün qəbirlər eyni formada olmalıdır. Hazırda dövlət səviyyəsində də bu müzakirələr gedir. Səhv etmirəmsə, Dini Qurumlarla iş üzrə Dövlət Komitəsi və Qafqaz Müsəlmanları İdarəsinin qəbirlərin eyni cərgədə qoyulması, bir qəbirin digərindən seçilməməsi və təmtəraqlı olmaması barədə layihələri var. Artıq bu planların həyata keçirilməsinə də başlanılıb. Qəbirlərlə şəkil paylaşmaq da düzgün deyil. Sosial şəbəkələrdə çox vaxt insanlar kimsə rəhmətə gedəndə qəbirlərlə şəkillər paylaşırlar. Dinə görə bu hal bəyənilmir”.
Elnarə Salamova
Xeberle.com
Xəbərdən istifadə edərkən istinad etmək vacibdir.
