Marşrut avtobusların dayanacaqdan kənar yerlərdə saxlayıb sərnişin mindirməsi və düşürtməsi Sumqayıt şəhərinin də problemlərindən biridir. Bu məsələnin həllinə dəfələrlə cəhdlər olub. Əhalinin avtobuslara rahat minib-düşməsi üçün yollarda ayrıca zolaqların yaradılmasına, dayanacaqların sayının çoxaldılmasına, dayanacaqdan kənar avtobus saxlayan sürücülərin cərimələnməsinə baxmayaraq, yenə də belə hallar müşahidə olunmaqdadır.

 

Məsələ ilə bağlı Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumov Xeberle.com-a bildirdi ki, avtobusların dayanacaqlardan kənar saxlamaları ilə əlaqədar olaraq hər gün sürücülər arasında maarifləndirmə işləri aparılır: "Çox zaman sərnişinlər özləri qaydaları pozmağa cəhd edirlər, ikinci problem isə şəhərsalmada - avtobus dayanacağı yerlərinin hələ də dəqiq təyin olunmamasıdır".

 

Avtobusla sərnişindaşıma sakinlərimiz üçündür. Sübh tezdən gecə yarısına qədər bizə xidmət edən avtobuslara yeri gələrsə, hər birimiz diqqət etməli, ictimai nəzarət funksiyasını həyata keçirməliyik. Axı problemlərin yaranmasına biz də əngəl ola bilərik. Üstəlik özümüzdə də təqsır olur. Harada gəldi, avtobusa əl edib dayanmasını istəyir, düşmək lazım olanda da sürücüdən dayanacaqdan kənarda saxlamağı tələb edirik. Hələ yaratdığımız problemlər bununla bitmir. Çoxu avtobusda qocalara, qadınlara və uşaqlı sərnişinlərə yer vermir. Pəncərəni istədiyi zaman açıb-bağlayanlarımız da yetərincədir. Oturacaqların cırılması, yazılması, hətta ayağın olmayacağı yerlərdə ayaq izlərinin olması adi hal alıb. Gediş haqqını verməyib düşənlər də var. Avtobusda xəstə, yorğun insanın, körpənin olduğunu bilə-bilə ucadan danışan, telefonun musiqisinə qulaq asanlara da rast gəlinir. Hələ ağzından spirt və sarımsaq qoxusu gələnləri, sərnişinlərin rahatlığını pozan, paltarlarını bulaşdıracaq yüklərlə minənləri demirəm... Biz şəhər həyatı yaşayırıq. Avtobusların dayanacaqdan kənar dayandırılması həm sərnişinlərin hüquqlarını pozmuş olur, həm də yollarda olan digər avtomobil sürücülərinin. Avtobusdakı sərnişinlər gecikir, digər sürücülər isə əziyyət çəkirlər. Ona görə başqasının hüquqlarını pozmayaraq, öz hüquqlarımızı gözəl bilməliyik. Bu tələb avtobus sürücülərinə də aiddir.

 

Avtobus nəqliyyatında olan çatışmazlıqlarda onların da nöqsanları çoxdur. Sürücülər hərəkətin digər iştirakçıları ilə bərabər çalışdığı şirkətə, onun sahibinə hörmət etməyi bacarmalıdırlar. Məsələnin bizlər üçün qaranlıq qalan tərəfi isə sürücülərə təyin edilmiş gündəlik plandır. Bu baxımdan sürücülər üçün bu planın çoxluğu, bir qisim marşrut avtobusların himayə olunması, marşrut xətlərinin düzgün planlaşdırılmaması, dayanacaqların azlığı, yollarda keçidlər arasında məsafənin uzaqlığı, dayanacaqların taksi və digər minik avtomobilləri tərəfindən zəbt edilməsi, sürücülərin təhqir olunması avtobuslarda sürücü ilə sərnişin arasında anlaşılmazlığa gətirib çıxarır. Amma biz sərnişinlər problemin həll olunmasına böyük kömək edə bilərik. Bunun üçün hər birimiz istifadə etdiyimiz marşrut avtobusların hərəkət cədvəli ilə yaxından tanış olmalı və xüsusən dayanacaqlardan istifadə etməliyik. Belə hərəkətlərimizlə məcbur edərik ki, səhlənkar sürücülər, avtobusların normal işləməsində maraqlı olmayan qüvvələr qaydalara tabe olsunlar.

 

Xeberle.com