Bu il qış sərt keçsə də, su boruları və kanalizasiya baxımından da şəhərdə problem yaşanmayacaq.
Bu barədə Sumqayıt şəhər Sukanal İdarəsinin rəis müavini Qurban Mikayılov Xeberle.com-a məlumat verib. Onun sözlərinə görə, bu qış hər şey normal olacaq.
Qurum rəsmisi deyir ki, bundan sonra yağan güclü yağış adət etdiyimiz kimi küçələrə və yollara dolmayacaq: "Problemli küçələrimiz İsmət Qayıbov, Çerkassi küçələridir ki, həmin ərazilərdə də çalışmışıq maksimum dərəcədə qabaqlayıcı tədbirlər görək. Çerkassi küçəsində ümimiyyətlə drenaj sistemi qurulmayıb, lakin buna baxmayaraq yağışlı havalarda küçələrdə su yığıntısının qarşısı alınır ki, əhaliyə və avtobillərə hərəkət zamanı maneçilik yaranmasın. O ki qaldı Sülh küçəsində yerləşən ticarət obyektlərinin alt hissəsində qalan yağış lyukları və drenajlara – bu barədə Şəhər İcra Hakimiyyətinin də qərarı var və məhkəmə də ticarət obyektlərinin sökülməsinə qərar verib. Ərazidə söküntü işləri geciksə də, məhkəmənin qərarını icra etməyə məcburdurlar. İdarəmiz həmin küçədəki lyukların bərpası üçün ticarət obyektlərinin qarşısından əlavə drenaj sisteminin qurulması təklifini də irəli sürmüşdü, lakin məhkəmə obyektlərin söküntüsü qərarını verdiyi üçün biz də prosesin həyata keçirilməsini gözləyirik. Bir sözlə, deyə bilərik ki, Sumqayıt Şəhər Sukanal İdarəsi payız-qış mövsümünə hazırdır və qarşıdakı aylarda əməkdaşlarımız daha səylə çalışacaqlar”.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
