Mütəmadi olaraq Sumqayıtın ictimai, mədəni xadimlərindən, millət vəkillərindən, tanınmış şəxslərindən müsahibələr hazırlayırıq. Budəfəki qonağımız Sumqayıt şəhər 41 saylı Birinci Seçki Dairəsindən Milli Məclisə deputat seçilmiş, Sumqayıt şəhər 18 saylı orta məktəbin direktoru Leyla Abdullayevadır. Onunla indiyədək gördüyü işlərdən, parlamentdə səsləndirdiyi təkliflərdən, Sumqayıtın problemlərindən və perspektivlərindən danışmışıq. Xeberle.com xanım millət vəkili ilə müsahibəni təqdim edir:

-Leyla xanım, neçə ildir məktəb direktoru vəzifəsində çalışırsınız?

-2005-2006-cı illər tədris ilində Sumqayıt şəhər 18 saylı məktəbə direktoru təyin olunmuşam. Buna qədər "İstedad” liseyində müəllim kimi çalışırdım. Hesab edirəm ki, etimadı doğrulda bildim. Sumqayıtın ictimai həyatında fəal iştirak etməyə başladım. Belə ki, möhtərəm cənab prezidentimiz İlham Əliyevin sərəncamıyla mən "Tərəqqi” medalı ilə məhz şəhərimizdəki fəaliyyətimə görə təltif edildim. Eyni zamanda, rəhbərlik etdiyim məktəb də "İlin məktəbi” adına layiq görüldü. Çox şadam ki, əməyimiz ölkə rəhbərliyi tərəfindən belə yüksək qiymətləndirildi. Sonradan şəhər bələdiyyəsinə də seçildim. Nəhayət, qurucusu ulu öndərimiz olan Yeni Azərbaycan Partiyasının namizədi kimi parlamentə seçildim. Sumqayıt şəhərinin tarixində ilk qadın millət vəkili oldum. Bununla da təbii ki, fəxr edirəm. Bütün bunların əsasında isə 18 saylı məktəbə rəhbərlik və şəhərin ictimai həyatında iştirak durur.

-Vaxtınızı daha çox Milli Məclisdə, yoxsa məktəbdə keçirisiniz?

-Bilirsiniz, bu müxtəlif vaxtlarda müxtəlif ola bilər. Bilirsiniz ki, Azərbaycan Respublikası Milli Məclisi ildə 2 dəfə - yaz və payız sessiyalarına toplaşır. Bu müddətdə təbii ki, parlament daha fəal işləyir. İstər Komitə, istər plenar iclaslar bu zaman baş tutur. Mütəmadi iclaslara toplaşırıq. Qalan günlər isə Milli Məclisdə qəbullar və cari işlər olur. Sessiyaların olmadığı dövrlərdə isə daha çox aydındır ki, Sumqayıtda oluram. Amma istənilən halda çalışıram ki, hətta iclaslar və tədbirlər olan gün belə məktəbə 1 saatlıq da olsa, baş çəkim. Yəni paralel şəkildə işləməyə çalışırıq.

-Sizin deputat qərargahınız yoxdur. Bu, nə ilə bağlıdır?

-Gəlin dəqiqləşdirək. Mənim seçicilərlə görüşdüyüm və köməkçimin cari işləri üçün istifadə etdiyi yer təbii ki, mövcuddur və bu 18 saylı məktəbin konfrans otağıdır. Orda bunun üçün lazımi şərait yaratmışıq. İnternetə çıxış, kompüter və ofis avadanlığı, karğüzarlıq üçün vasitələr, printer və sair. Otaqda eyni zamanda 20 seçicini qəbul etmək mümkündür. İndi orada təmir gedir, İnşaallah oranı daha da genişləndirəcəyik. Konkret qərargah isə yalnız məndə deyil, bəzi deputatlarda da yoxdur. Amma bu, yəqin ki, yaxında həll ediləcək. Dövlətimiz bu işlə məşğuldur. Yəqin ki, tezliklə bütün deputatlar üçün dövlət hesabına ofislər tikiləcəkdir. Hər halda belə müzakirələr gedir. Ümumiyyətlə, bunu problem saymıram. Ayrıca ofisin olub-olmaması 2-ci dərcəli işdir. Bu, mənim fəaliyyətimə əmin olun ki, heç bir maneə yaratmır.

-Sumqayıtda insanları narahat edən problemlər varmı?

-Nəinki Sumqayıtda, bütün dünyada, hər bir yerdə insanları narahat edən probləmlər var. Bu, həyatın normasıdır. Amma sualı belə qoyaq: bu problemlər çoxalır, ya azalır, yəni dinamika necədir? Bu problemlər həll edilirmi? Bu suallara cavab verək. Mən əminliklə deyirəm ki, bu problemlər getdikcə azalıb. İstər şəhər təsərrüfatı, istər məşğulluq, istərsə də digər məsələlər. Böyük işlər görülür. Bunu danmaq olmaz. Problemlər həll edilir. Məsələ budur. Bilirsiniz ki, cənab prezidentin "Bakı standartlarına uyğun Sumqayıt” prinsipi vəzifə kimi qoyulubdur və bu vəzifə şəhər icra hakimiyyəti, onun başçısı Eldar müəllim tərəfindən uğurla icra olunur. Sizə bir fakt deyim. Biz deputatlara artıq gələn ilin büdcə layihəsi paylanıbdır. Onun üzərində işləyirik. Büdcəyə görə, Sumqayıt dotasiyasız şəhər statusundadır. Başqa sözlə, şəhər "özü-özünü dolandırır”. Bu, elə bir göstərici deyilmi?! Sumqayıtlıları narahat edən məsələrər, məsələn, Sumqayıt hadisələridir. Bilirsiniz, ermənilər necə istifadə edirdi bundan öz yalançı təbliğatlarında. Amma bir neçə il əvvəl cənab prezident göstəriş verdi ki, bu məsələlər yenidən araşdırılsın. Baş Prokurorluq bu işlə məşğul oldu. İndi biz müdafiə yox, hücüm vəziyyətindəyik erməni təbliğatına qarşı. Və təbii ki, məni, bütün həyatını burada keçirmiş bir sumqayıtlı və bir azərbaycanlı kimi şəhərimizin adının belə hallandırılması həmişə məyus edirdi. Sumqayıt ulu öndərimizin də dediyi kimi, ”dostluq, həmrəylik şəhəridir” əslində. İndi isə biz erməni tərəfinin bütün arqumentlərini alt-üst edirik. Nə qədər kitablar çap edildi, filmlər çəkildi. Bunlar böyük məsələlərdir. Yeri gəlmişkən, 2011-ci ildə Milli Məclisdəki ilk çıxışımda mən elə bu məsələyə toxunmuşdum.

-Sumqayıtda hansı istehsal sahələrinin inkişafına ehtiyac var?

-Sumqayıt həmişə sənaye şəhəri olub. Bu gün də belədir. Hesab edirəm ki, bu baxımdan şəhərimizdə hər şey qaydasındadır. Şəhər artıq qeyd etdiyim ki, dotasiyasız da yaşayır. Hansı sahələr, istehsal məsələsinə gəldikdə isə indi artıq bazar iqtisadiyyatı şəraitində yaşayırıq. Tələb-təklif qanunu işləyir. Azad sahibkarlıq mövcuddur. Əgər ehtiyac yaranacaqsa, bazar özü bunu tənzimləyəcək. Amma yenə deyirəm, bu baxımdan Sumqayıt flaqman şəhərlərimizdəndir.

-Milli Məclisdə Sumqayıtın hansı problemlərini qabartmısınız?

-Bilirsiniz ki, Sumqayıt prezidentimiz cənab İlham Əliyevin daim diqqət mərkəzindədir. Burada gedən quruculuq işləri bilavasitə onun tapşırıqları ilə həyata keçirilir. Buna görə də mən də, seçicilərim də, bütün sumqayıtlılar da ona çox minnətdarıq. Deputatın işi konkret məsələləri dövlət orqanları, hökümət qarşısında qaldırmaqdır. Bu baxımdan mənə gəlincə, hər şeydən əvvəl belə bir təklifim var əziz sumqayıtlılara. Milli Məclisin rəsmi saytına daxil olsunlar, orada xüsusi bölmə var: iclasların stenoqramları. Orada Leyla Abdullayeva adını axtarışa versinlər. Bu 4 ildə etdiyim çox sayda çıxışlarla, təkliflərlə, layihələrlə tanış olsunlar. Bu bölmədə mənim bütün çıxışlarımın rəsmi stenoqram-mətnləri qanunvericiliyin tələblərinə uyğun olaraq yerləşdirilibdir. Ətraflı olaraq belə. Amma əsas qaldırdığım və ən əsasaı-müsbət həll olunan məsələrdən qeyd edə bilərəm: Sumqayıtda "Stansiya Sumqayıt” deyilən yaşayış massivinin vəziyyəti və oraya qəsəbə stausunun verilməsi haqda. Yolların, tibb məntəqəsinin vəziyyəti və s. Bu məsələni mən Nazirlər Kabinetinin illik yekun hesabatında qaldırmışam. Hökümətimiz də bunu nəzərə aldı. Bundan sonra bu məsələ xüsusi dövlət proqramına - "Regionların sosial-iqtisadi inkişafı proqramına” salınıb. Orada İcra Hakimiyyətinin də dəstəyilə böyük işlər görüləcək. Sumqayıtda qəza vəziyyətində olan yataqxananın vəziyyəti. Hökümətin hesabatı zamanı bu məsələni qaldırdım. Bilirsiniz ordakı vəziyyəti. Bununla bağlı icra başçısı hörmətli Eldar müəllimlə də məsləhətləşmələrimiz olmuşdu. Bundan sonra məsələnin həlli daha da sürətləndi. Bu məsələ öz müsbət həllini tapdı. Bakı-Sumqayıt yolunda olan tıxaclarla əlaqədar. Bu problem doğrudan hamını narahat edir. Təklif etdik ki, alternativ yollar çəkilsin, yol böyüdülsün. Hətta sürət qatarı da çəkilə bilər. İndi bu işlər gedir, yəqin mətbuatdan da bilirsiniz, xüsusi layihələr nəzərdən keçirilir. Bu məsələ ümumiyyətlə hökümətin diqqətindədir. Bağçaların vəziyyəti ilə bağlı. Maliyyə naziri cənab Samir Şərifovdan xahiş etdik, oraya ayrılan vəsait artırılsın. Doğrudan 2014-cü il büdcəsində bu vəsait xeyli artırıldı. Bundan başqa, bir sıra müəssisələrin, əsasən də 41 saylı dairədə yerləşən təhsil müəssisələrinin təmiri məsələsini də qabartmışam, hökümət üzvlərindən xahiş etmişəm. Siz ancaq Milli Məclisdə qaldırdığım məsələləri deyirsiniz, amma ayrı-ayrı orqanlar, Nazirlik, Komitələr qarşısında qaldırdığım məsələlər də xeyli olub. Eyni zamanda qanun layihəsi hazırlayıb təqdim etmişəm ki, unutmayaq ki, deputatın işi hər şeydən əvvəl qanunvericilik prosesindən ibarətdir. Ümumiyyətlə, 20-dən çox təklifimiz artıq, əminliklə deyə bilərəm ki, qanunlarda əks olunub. Bu, ilk dəfə seçilən deputat üçün az nəticə deyil. Yeri gəlmişkən, bu yaxınlarda büdcə müzakirələri başladıqdan sonra da Sumqayıtla bağlı təkliflərimiz olacaq. İndi onların üzərində işləyirik. Sumqayıt şəhər İcraHakimiyyəti ilə sıx əlaqədə daha nə edə bilərik sualı üzərində fikirləşirik. Əminəm ki, prezidentimizin quruculuq, abadlıq və inkişaf siyasəti Sumqayıtda daha böyük işlərin görünməsinə rəvac verəcəkdir. Bütün görülən işlər də bu siyasətin tərkib hissəsidir.

-Deputatlığınız dövründə seçicilərinizlə neçə dəfə görüşmüsünüz?

-Bu görüşlərin sayı çoxdur. Həftənin adətən şənbə günlərində müraciət edən seçiciləri qəbul edirəm. Həftə ərzində köməkçim onları qeydə alır, həfətəsonu mən görüşürəm. Bəzi seçiciləri parlamentdə də qəbul edirik. İndi siz hesablayın görək nə qədər edir. Mən daha çox fərdi qəbullara üstünlük verirəm. Bayram günlərində, əlamətdar günlərdə ümumi görüşlərimiz də olur. Köməkçimdə dəqiq rəqəmlər var, belə ki, hər il o, 2 dəfə bütün bu görüş və tədbirlər haqda Milli Məclis Aparatına hesabat verir. Dəqiq onu deyə bilərəm ki, heç kimlə görüşdən imtina etməmişik.

-Seçiciləriniz sizdən əsasən hansı problemlərin həll olunmasını istəyir?

-Əsasən sosial–məişət xarakterli olur. Məişət məsələlərinin həlli və s. Bu istiqamətdə. Xüsusi olaraq qeyd edim ki, 2 nəfər qanunvericilik təşəbbüsü ilə müraciət etmişdi. Qanunlarda dəyişiklik istəyirdilər. Amma bütövlükdə, torpaq sahəsi almaqda köməklik, ev problemi, hüquqi problemlər olur.

-Gələn il Azərbaycanda növbəti parlament seçkiləri keçiriləcək. Leyla Abdullayeva yenidən namizədliyini verəcəkmi?

-Bunu zaman göstərəcək. Bu barədə hələ danışmaq tezdir.

Söhbətləşdi: Ramil Zeynallı