Sumqayıt Ağır Cinayətlər Məhkəməsində quldurluqda təqsirləndirilən Əşrəf Quliyevin (şərti) cinayət işi üzrə məhkəmə iclası başa çatıb.
Pravda.az-ın əldə etdiyi məlumata görə, hakim Fəhmin Hümbətovun sədrliyi ilə keçirilən prosesdə hökm elan olunub.
Hökmə əsasən, o, 8 il 6 ay müddətinə azadlıqdan məhrumetmə cəzasına məhkum edilib.
İttihama görə, Əşrəf Quliyev 7 noyabr 2021-ci il tarixdə, saat 01 radələrində özgənin əmlakını ələ keçirmək məqsədilə Bakı şəhəri, Nizami rayonu, Neftçilər metrostansiyasının yaxınlığında Abşeron rayonu Hökməli qəsəbəsinə getmək üçün sərnişin qismində əyləşdiyi zərərçəkmiş Vahid Məmmədovun (şərti) idarə etdiyi "Chevrolet Cruze” markalı avtomobil ilə həmin gün saat 01:40 radələrində Hökməli qəsəbəsinə çatıb. O, zərərçəkmiş şəxsi avtomobili kənar şəxslərin olmadığı yerə sürdürərək, saxlatdırıb, özü ilə götürdüyü silah qismində istifadə edilən tameti tətbiq etməklə ona hücum edib. Əşrəf həmin tametlə əvvəlcə Vahidin başına bir dəfə zərbə endirib, daha sonra onun əmlakını ələ keçirməyə yönəlmiş cinayətkar hərəkətlərini davam etdirməklə sürücünün sol əlinə bir dəfə zərbə vurub. Təqsirləndirilən şəxs zərərçəkmiş şəxsə ümumilikdə 710 manat 75 qəpik məbləğində maddi ziyan vurmaqla quldurluq edib.
Xəbərdən istifadə edərkən istinad etmək vacibdir.
