Sumqayıtda uzun illərdən bəri tikintisi başa çatdırılmamış obyektlər var ki, bunlardan da biri "Şərq Bazarı”nın yaxınlığında yerləşir. Bu obyektin bazar kimi fəaliyyət göstərməsi nəzərə tutulsa da, aparılan tikinti işləri yarımçıq qaldı və ərazi zibilliyə çevildi. Uzun illərdir yarımçıq qalan bu tikili sahibsiz itlərin məskəninə çevrildi və sakinləri də narahat etməyə başladı. Həmçinin, belə tikililər şəhərin ümumi görünüşünə, estetik gözəlliyinə də xələl gətirir.

Artıq bu gün həmin tikilinin sökülməsinə qərar verilib. Xeberle.com-a daxil olan məlumata görə, bu yarımçıq tikili sökülərək ərazi abadlaşdırılacaq, burada bağça və musiqi məktəbi tikilərək şəhər sakinlərinin ixtiyarına veriləcək.

Qeyd edək ki, Sumqayıtda abadlıq işləri bu gün daha sürətlə və yeni məzmunda davam edir. Şəhərin 1, 3, 6, 9, 17 və 18-ci mikrorayonlarında, 47, 48-ci məhəllələrində daxili yolların, bağlar massivinə gedən yolun asfalt örtüyü təmir olunub. Heydər Əliyev, Azərbaycan prospektləri və 20 Yanvar küçəsi boyunca yaşayış binalarının fasadları aqlay üzlük daşlarla üzlənir. Şəhərin əsas girişində - Sülh küçəsinin başlanğıcında yolun genişləndirilməsinə, Çerkassı küçəsinin təmirinə və dənizkənarı ərazidə yenidənqurma işlərinə, Heydər Əliyev Mərkəzinin yeni binasının inşasına başlanılıb.

Həmçinin şəhərdə 48 uşaq bağçasının dam örtüyünün və istilik sisteminin əsaslı təmir olunması, 17 və 18-ci mikrorayonlarda yaşayış binalarının dam örtüyünün dəyişdirilməsi, zirzəmilərdə əsaslı təmir işləri aparılır.

Xeberle.com