Sumqayıtda qarlı hava şəraiti bir sıra çətinliklər yaradıb. 

Xeberle.com xəbər verir ki, hazırda dayanacaqlarda avtobus gözləyən çox sayda sərnişin  yolda qalıb. 
Sərnişindaşıma ilə məşğul olan avtobusların intervalında gecikmələr müşahidə olunur. Bəzi avtobuslar isə xəttə buraxılmayıb. Şəhər sakinlərinin Xeberle.com-a verdiyi məlumata görə, Sumqayıtın əsas avtobus xətti olan 7 nömrənin qrafikində çox gecikmələr olur. Bu bəzən 1 saatı da belə keçir. Eyni zamanda, 30 nömrəli avtobus xəttindədə gecikmələr müşahidə edilir. Şəhərin digər avtobus xətləri isə ümumiyyətlə fəaliyyətini dayandırıb. 
Gedəcəkləri ünvana vaxtında çata bilməyən şəhər sakinləri aidiyyatı qurumlardan kömək istəyir. 
Sumqayıtda intensiv yağan qardan sonra yolların çoxu hələlik təmizlənməyib. Xeberle.coma-a danışan sakinlər qarlı günləri və ondan sonrakı durumu təsvir edərkən yolda "sürüşə-sürüşə" getdiklərini deyiblər. Bir çox yolların vaxtında qardan təmizlənməməsi səbəbindən bu gün bəzi ərazilərdə həm piyadaların, həm də avtomobillərin hərəkətində çətinliklər yaranıb. Sumqayıtdan dəfələrlə böyük olan Bakıda yollarda təmizlənsə də, təəssüf ki Sumqayıtda təmizlik işləri aparılmayıb.
Məsələ ilə bağlı Oxu.Az-ın sorğusunu cavablandıran Sumqayıt Şəhər İcra Hakimiyyətinin mətbuat katibi Eyvaz Qocayev bildirib ki, gecə saatlarından etibarən yolların qardan təmizlənməsinə başlanılıb:
"Sumqayıt şəhəri ərazisində hərəkətin təmin olunması məqsədilə 14 yanvar tarixində gecə saatlarından yolların qardan təmizlənməsinə başlanılıb. Yollara xeyli sayda texnika və canlı qüvvə cəlb edilərək, təmizlənmə işləri aparılıb. Hal-hazırda da tədbirlər görülür. Həm ötən gün, həm də bu gün ərzində şəhər ərazisində yollarda nəqliyyatın hərəkətində məhdudiyyət olmayıb. Sumqayıt şəhərində fəaliyyət göstərən ictimai nəqliyyatın fasiləsiz fəaliyyəti təmin edilib”.

Elşən Yəhyayev