Azərbaycanın "Silk Way" aviaşirkətinə məxsus təyyarə qəzaya uğrayıb.

Təyyarə pilotlarının yaxınlarının "Report"a verdiyi xəbərə görə, qəza bir neçə saat öncə "AN-12" tipli yük təyyarəsi Əfqanıstandan havaya qalxdıqdan sonra baş verib.

Heyət üzvlərindən ikisinin vəziyyəti ağırdır, digərləri həyatlarını itirib. Yaralıların Ukrayna vətəndaşları olduğu bildirilir.

*** ƏLAVƏ OLUNUB

Azərbaycan Dövlət Mülki Aviasiya Administrasiyasının yaydığı məlumata görə, qeyri-dəqiq məlumata görə, Əfqanıstanın Gilmənd əyalətində ölkə daxilində yük daşımaları məqsədilə Azərbaycanın "Silk Way" şirkətindən icarəyə götürülən "An-12" təyyarəsində Dvayer hava limanından uçuş zamanı aviasiya hadisəsi baş verib.

Hadisə Bakı vaxtı ilə təqribən saat 18:30 radələrində qeydə alınıb. İcarəyə götürülən təyyarə beynəlmiləl heyət tərəfindən idarə olunub. Hava gəmisinin heyət üzvləri arasında 1 Özbəkistan (kapitan), 3 Ukrayna və 5 Azərbaycan vətəndaşı olub.

Dövlət Mülki Aviasiya Administrasiyası tərəfindən hadisənin araşdırılması üzrə komissiya yaradılıb. Hazırda Əfqanıstan aviasiya qurumları ilə hadisənin səbəblərinin araşdırılması məqsədilə mayın 19-da komissiyanın nümayəndələrinin hadisə yerinə getməsi üzrə razılaşdırma prosesi gedir.