Xəbər verdiyimiz kimi, Sumqayıtda iki kafede yanğın baş verib.
Xeberle.FHN-in saytına istinadən məlumatına görə, vətəndaşa məxsus ümumi sahəsi 150 m2 olan kafenin mətbəxinin yanar konstruksiyaları 50 m2 sahədə yanıb.
Yüksək temperaturdan bitişik tikilmiş sahəsi 200 m2 olan kafenin tavanı 25 m2 sahədə əriyib. Yanğın zamanı yaşayış binasından 12 nəfər sakin yanğınsöndürənlər tərəfindən təxliyyə olunub və 3 nəfər tüstüdən zəhərlənmiş halda xilas edilərək təcili tibbi yardım xidmətinə təhvil verilib.
Hər iki kafenin qalan hissəsi və yaşayış binası yanğından mühafizə olunub. Yanğın saat 02:59-da yanğınsöndürənlər tərəfindən söndürülüb.
Daxili İşlər Nazirliyi Sumqayıtda kafelərdə baş verən yanğınla bağlı məlumat yayıb.
Nazirlikdən verilən məlumata görə, oktyabrın 29-da saat 02 radələrində Sumqayıt şəhərindəki binalardan birinin birinci mərtəbəsində yerləşən, şəhər sakini Tehran Əsgərova məxsus kafedə yanğın baş verib. Nəticədə kafenin yanar konstruksiyaları və oradakı əşyalar yanıb, həmin binanın 2-ci mərtəbəsində yaşayanlar Töhrə Məmmədova, nəvələri Məryəm və Mədinə tüstüdən zəhərlənmə ilə xəstəxanaya gətirilib. Onlara ilkin tibbi yardım göstərildikdən sonra buraxılıb.
Xeberle.com-un əməkdaşı yanğının baş verdiyi ərazidə olub. Belə ki ötən gecə dəhşətli yanğın 29-cu məhəllədə yaşayış binalarının yaxınlığında olan "Dostluq" və "Tehran" kafelərində olub. Hadisənin bəzi təffərüatları Xeberle.com-a məlum olub. Yanğının ilk olaraq "Tehran" kafesində baş verdiyi bildirilir. Maraqlıdır ki, bu kafedə baş verən yanğın bu obyektin yanında olan "Min bir xırdavat" dükanına keçməyib. Əvəzində isə növbəti obyektə- "Dostluq" kafesinə doğru genişlənib. Məlumata görə iki kafenin arasında yerləşən mağazanın konstruksiyası betondan olduğundan həmin obyekt alışmayıb və nəticədə yanğının miqyası genişlənərək digər obyektə - "Dostluq" kafesinə keçib. Hər iki obyektin fasadına zərər dəyməsə da, kafelərin içərisində olan əşyalar və yanar konstruksiyalar külə dönüb.
Yanğının dəqiq səbəbi aparılan araşdırmalardan sonra məlum olacaq.
Xeberle.com
Video və fotolar Xeberle.com-undur.
Xəbərdən istifadə edərkən istinad etmək vacibdir.
