Dünən Bakıda polis əməkdaşlarının həyatlarını təhlükəyə ataraq köməksiz vəziyyətdə qalan 3 uşağı xilas etdiyi hadisənin görüntüləri yayılıb.
Xeberle.com xəzərxəbər-ə istinadən xəbər verir ki, görüntüdə birinci mərtəbədəki mağazanın yanması və tez-tez partlayışın baş verməsi müşahidə olunur.
Xatırladaq ki, fevralın 3-də səhər saatlarında paytaxtın Nəsimi rayonu Şamil Əzizbəyov 156 ünvanında yerləşən üçmərtəbəli binanın girişindəki mağazada yanğın olub. Dərhal hadisə yerinə Fövqəladə Hallar Nazirliyinin aidiyyatı qurumlarının və Nəsimi Rayon Polis İdarəsinin əməkdaşları cəlb edilib.
Sakinlərin təxliyyə edilməsi üçün təxirəsalınmaz tədbirlər görülüb.
Binanın üçüncü mərtəbəsindəki evlərin birində köməksiz vəziyyətdə qalmış və tüstüdən zəhərlənmiş 14 yaşlı Kərəm, 12 yaşlı Elcan və 9 yaşlı Selcan Səfərlilər polis əməkdaşları tərəfindən xilas edilib, onlara ilkin tibbi yardım göstərilb. Qohum olan azyaşlıların vəziyyətləri qənaətbəxşdir.
Yanğınsöndürənlər tərəfindən alovun qarşısı alınıb.
Hadisə nəticəsində azyaşlıları xilas edən Nəsimi RPİ-nin Post Patrul Xidmətinin əməkdaşları - polis serjantları Qoşqar İşmayılov və Kamran Əhmədli tüstüdən zəhərləniblər. Onlar xəstəxanaya yerlədiriliblər.
Xəbərdən istifadə edərkən istinad etmək vacibdir.
