Müdafiə Nazirliyinin mətbuat xidmətindən ANS PRESS-ə verilən məlumata görə, düşmənin cəbhə bölgəsində təxribatları davam edir.

Fevralın 6-da saat 18.40-da erməni silahlı bölmələri atəşkəs rejimini pozaraq mövqelərimizi atəşə tutublar. Nəticədə Silahlı Qüvvələrimizin müddətdən artıq həqiqi hərbi xidmət keçən əsgəri Eşqin Firəddin oğlu Quliyev döyüş tapşırığını yerinə yetirərkən düşmən tərəfindən açılan snayper atəşindən şəhid olub.

Müdafiə naziri general-polkovnik Zakir Həsənovun əmrilə döyüş postunda şəxsi şücaət göstərdiynə görə əsgər Eşqin Firəddin oğlu Quliyev ölümündən sonra “Hərbi xidmətdə fərqlənməyə görə” 3-cü dərəcəli medalı ilə təltif edilib.

Müdafiə Nazirliyi rəhbərliyi şəhidin valideynlərinə və yaxınlarına dərin hüznlə baş sağlığı verir və səbr diləyir.

***10.07

Ötən gecə Tərtər rayonu ərazisində cəbhə xəttində, N saylı hərbi hissədə əsgər dünyasını dəyişib. Məlumata görə, Azərbaycan Silahlı Qüvvələrinin əsgəri Eşqin Quliyev dünyasını dəyişib.

ANS PRESS məlumatı dəqqləşdirmək üçün Müdafiə Nazirliyilə əlaqə saxladı. Nazirliyin mətbuat xidmətindən  faktı təsdiqlədilər və yaxın saatlarda hadisənin təfərrüatları barədə məlumat veriləcəyi bildirildi.