Astarada piyadanın xəsarət alması ilə nəticələnən zəncirvari yol nəqliyyat qəzası baş verib. APA TV-nin cənub bürosunun məlumatına görə, hadisə ötən gecə Ələt-Astara magistralının 220 km-də, rayonun Pensər kəndi ərazisindən keçən hissəsində qeydə alınıb. Astara rayonunun Təngərüd kənd sakini, 53 yaşlı Sənan Məmməd oğlu Nəcəfov idarə etdiyi “VAZ-2106” markalı minik avtomobili ilə rayonun Hamuşam kənd sakini, 21 yaşlı Ayaz Sarvan oğlu Cəbizadəni vurub. Bundan sonra maşın idarəetməni itirərək Pensər kənd sakini, 34 yaşlı Loğman Ərəstun oğlu Bayramova məxsus “QAZ-24” markalı minik avtomobilinə çırpılıb. “QAZ-24” markalı maşın isə güclü zərbənin təsirindən yolun kənarında dayanmış “KamAZ” markalı  yük maşınına dəyib. Lənkəran rayon mərkəzi xəstəxanasına çatdırılan Ayaz Cəbizadənin vəziyyəti orta-ağırdır. Həkim Elşad Qubadov deyib ki, xəstənin vəziyyəti ağırdır.

Hadisə yerində olan yol polisi bölməsinin əməkdaşlarının qənaətincə, qəza yüksək sürət səbəbindən baş verib. Hadisənin dəqiq səbəbləri isə aparılan avtotexniki ekzpertizanın rəyindən sonra məlum olacaq. Faktla bağlı Astara Rayon Polis Şöbəsində araşdırma aparılır.