Yaşar Əhmədovun ailə münaqişəsi ilə bağlı təfərrüat
Bu gün səhər aldığımız ilk xəbər intiharla bağli oldu.

Xeberle.com bildirir ki,Real-ın çəkiliş qrupu  hadisə yerinə yollanıb. Məlum oldu ki, "Koroğlu” qovşağindakı asma körpüdən özünü ataraq intihar etmək istəyən şəxs 49 yaşlı Yaşar Əhmədovdur. O, ailə münaqişəsi zəminində intihar etmək məqsədi ilə körpünün üzərinə çixib. 
Bu hadisədə daha bir maraqlı məqam isə intihar etmək istəyən Tovuz sakinini fikrindən Azərbaycan Respublikasının baş naziri Novruz Məmmədovun daşındırması olub. 

Yaşar Əhmədov baş nazirə bildirib ki, iki övladı var, anası onları harasa apardığından uşaqlarını tapa bilmir, buna görə də intihar etmək istəyir. 
Baş nazir Ailə, qadın və Uşaq Problemləri üzrə Dövlət Komitəsinə göstəriş verib ki, Yaşar Əhmədovun problemi araşdırılsın, övladlarının harada olduğu öyrənilsin. Hazirda komitədə araşdirma davam edir. 

Real-ın əldə etdiyi məlumata görə, günün əsas xəbərinə çevrilən Yaşar Əhmədovu Komitənin rəhbəri Hicran Hüseynova şəxsən qəbul edib. Onunla söhbət zamanı məlum olub ki, uğrunda intihar etməyə hazirlaşdığı uşaqları və "həyat yoldaşım” dediyi xanımla Yaşar Əhmədovu heç bir rəsmi sənəd bağı bağlamır. Söhbət ondan gedir ki, cütlük arasında rəsmi nikah yoxdur. Bu azmış kimi, uşaqların da atalıqla bağlı sənədləri qaydasında deyil. 
Daha bir məlumat bundan ibarətdir ki, intihara cəhd edən Yaşar Əhmədovun sözügedən uşaqları və onların anası bundan əvvəl bir neçə dəfə Ailə, Qadın və Uşaq Problemləri üzrə Dövlət Komitəsində olub. Onlari komitəyə iştirak etdikləri televiziya proqramı göndərib. Əri tərəfindən döyüldüyünü və küçələrdə qaldığını iddia edən qadın televiziya proqramına bununla bağlı müraciət edib. Komitə xanımı uşaqları ilə birlikdə siğinacağa yerləşdirib və onu işlə təmin edib. Ailəsi ilə heç cür dil tapa bilməyən Yaşar Əhmədov isə çarəni körpüyə çıxmaqda görüb. O, bununla intihar etmək istəyib, ya diqqət cəlb etmək, bu, mübahisəlidir. Səqiq olan isə budur ki, bu məsələ birbaşa hökumət başçisinin nəzarətindədir və araşdırmalar davam edir.