"Barselona"nın futbolçusu Lionel Messi beş il sonra bir ilkə imza atıb.

Argentinalı hücumçu beş ildən sonra özündən başqa, digər komanda yoldaşının matçın əsas vaxtı zamanı təyin olunan penaltini vurmasına icazə verib.

Bu, İspaniya kubokunun yarımfinalında dünən keçirilən "Vilyareal"a qarşı (3:1) oyunda baş verib. Messinin razılığından sonra Neymar rəqib qapısına təyin olunan penaltini yerinə yetirib. Ancaq braziliyalı hücumçu bu imkanı dəyərləndirə bilməyib.

Messi sonuncu dəfə 2010-ci il martın 21-də "Saraqosa"ya qarşı görüşdə sabiq komanda yoldaşı Zlatan İbrahimoviçin on bir metrlik cərimə zərbəsini yerinə yetirməsinə razılıq vermişdi.

Dünənki oyundan sonra "Barselona"nın baş məşqçisi Luis Enrike deyib ki, komandada hər zaman penaltini birinci vurmaq hüququ Lionel Messiyə məxsusdur:

"İkinci isə Neymardır. Əgər Neymar penalti zərbəsini yerinə yetirmək istəyirsə, Messidən icazə almalıdır".  (qol.az)