Yer üzünün ən vəhşi məxluqunun insan olması fikri çoxlarında qıcıq yaradır. Lakin son günlər insanlar tərəfindən dilsiz-ağızsız heyvanlara edilən vəhşilikər bu fikri bir daha təsdiqləyir.

 Saray yolunda bir nəfər iti maşının arxasına bağlayaraq aparır. İsti havada it maşının sürətinə davam gətirməyərək az qala canını tapşırır. Əməkdaşımız həmin şəxsə yaxınlaşaraq itə niyə belə zülm etdiyinin səbəbini soruşanda “Novxanıya, bağa aparıram” cavabını eşidib.

 Həmin şəxs bağının keşikçisini - həyətini, mülkünü, özünü, ailəsini qorumağı etibar etdiyi iti bu hala salır, maşınında onu aparmağı ona rəva bilmir. Hər addımda günahsızlıqdan, mərhəmətdən danışan insanlar heyvanların gözlərindəki günahsızlığı nədənsə görmürlər. Sahibinə qarşı həmişə sədaqəti ilə seçilən canlıdan belə vəhşilikdən sonra etibar gözləməyin özü insanlığa sığmır.

Bir neçə gün əvvəl Novxanıda sahibindən heyf çıxmaq üçün onun atının ayağı kəsilib, daha sonra isə Suraxanıda qoyunlar minik maşınına kartof kimi yüklənərək daşınıb. Budur insanlıq?(milli.az)