Bakı Apelyasiya Məhkəməsində qonşusunu döyüb öldürməkdə təqsirləndirilən Şöhrət Qədimovun şikayətinə baxılıb.

Xeberle.com-un Qafqazinfo-ya istinadən verdiyi xəbərə görə, hakim Rizvan Səfərovun icraatında olan prosesdə qərar elan edilib. Qərara əsasən, Ş.Məmmədovun cəzanın yüngülləşdirilməsi barədə şikayəti rədd edilib, hökm dəyişdirilmədən qüvvədə saxlanılıb.
İttihama görə, 2016-cı ilin dekabr ayında Bakının Sabunçu rayonu, Kürdəxanı qəsəbəsi, Quşçuluq sovxozunda yaşayan 30 yaşlı Şöhrət Qədimov qonşusu Şeydə Məmmədovu döyüb. Xəstəxanaya çatdırılan yaralı orada dünyasını dəyişib.

Ş.Qədimov Cinayət Məcəlləsinin 126.3-cü (qəsdən sağlamlığa ağır zərər vurma, ölümə səbəb olduqda) və 228-ci (qanunsuz silah saxlama) maddəsi ilə ittiham olunub. Bakı Ağır Cinayətlər Məhkəməsinin hökmü ilə 13 il müddətinə azadlıqdan məhrum edilib.