2013-cü ilin dekabr ayında Türkiyənin Naxçıvanla sərhəddəki Dilucu gömrük məntəqəsində həyata keçirilən rüşvət və qaçaqmalçılıq əməliyyatı çərçivəsində Qarsda həbs olunmuş Sədərək Gömrük İdarəsinin rəisi Mirməhəmməd Seyidovun sərbəst buraxıldığı haqda xəbər yayılıb.
Qeyd edək ki, ötən il dekabrın 17-də M.Seyidovu Qars Hava Limanında Türkiyə Qaçaqmalçılıq və Mütəşəkkil Cinayətkarlıqla Mübarizə Şöbəsinin əməkdaşları saxlamışdılar. Seyidovdan başqa həmin vaxt Dilucu sərhəd-keçid məntəqəsində keçirilən əməliyyat zamanı 7 gömrük işçisi, 10 daşıma şirkətinin sahibi olmaqla 17 nəfər saxlanılmışdı. Onlar cinayət törətmək məqsədilə təşkilat qurmaq, rüşvət alıb-vermək, maye yanacaq qaçaqçılığı etməkdə şübhəli bilinirdilər.
Modern.az saytı Türkiyə mətbuatın istinadən bu hadisə ilə bağlı təfərrüatları təqdim edir.
İndi məlum olur ki, saxlanılanların sorğu-sualı zamanı rüşvətin Sədərək gömrüyündə Mirməhəmməd Seyidov tərəfindən toplandığı, daha sonra Türkiyə tərəfinə aparılaraq, tərəflər arasında bölüşdürüldüyü ortaya çıxıb. Bundan başqa, hər iki tərəfdən olan gömrükçülərin telefon danışıqları da məlum olub. Məlumatlarda qeyd edilir ki, Türkiyə tərəfindəki gömrük məmuru Seyidovu cib telefonu ilə arayanda “Sancılandım, mənə dərman göndər” deyərək pay istəyirmiş. Seyidovun isə qarşı tərəfə “Sancın üçün dərman göndərdim” deyə cavab verdiyi bildirilir. Normal günlərdə isə Sədərək Gömrük İdarəsinin rəisi toplanan rüşvət pullarını paket içində əməkdaşlıq etdiyi adamlara pay verirmiş.
Digər məlumata görə, Dilucu gömrük məntəqəsinin hər iki tərəfində rüşvət və qaçaqçılıq faktlarını ortaya çıxarmaq məqsədilə bir il əvvəldən texniki təqib başladılıbmış. Türkiyə tərəfindəki gömrük vəzifəliləri ilə nəqliyyat firmaları sahiblərinin həm evləri, həm də iş yerləri axtarılıb. Gömrük məmurlarından biri evinə polisin gəldiyini fərq edincə, içində 23 min 500 ABŞ dolları və 23 min türk lirəsi olan paketi pəncərədən küçəyə atıb, amma bu, polislərin gözündən yayınmayıb. Gömrük məmurları ilə nəqliyyat firma sahiblərinin ev və iş yerlərində aparılan axtarışlarda 130 min ABŞ dolları, 50 min türk lirəsi, çox sayda imzalanmış, amma üzərində miqdar olmayan sənəd, maye yanacaq qaçaqlığı edildiyinə dair sənədlərlə 1 sənədsiz tapança tapılıbmış.
Xəbərdən istifadə edərkən istinad etmək vacibdir.