Son məlumata görə, polislər RATİ-nin ofisinə daxil ola biliblər.
Belə ki, hadisə yerinə RATİ-nin ofis üçün icarəyə götürdüyü mülkün hüquqi sahibi çağırılıb.
Mülkin sahibi RATİ-nin əməkdaşlarından qapını açmağı xahiş edib.
Təşkilatın əməkdaşları onun xahişindən sonra qapını açıblar. Bundan sonra polislər ofisə daxil olublar.
Ancaq polislər ofisə hansı səbəbdən daxil olmaları barədə mətbuat nümayəndələrinə hər hansı məlumat verməkdən yayınıblar.
*****
15:41
Hazırda hadisə yerində olan musavat.com-un əməkdaşı Fərahim İlqaroğlunun verdiyi son məlumata görə, RATİ-nin əməkdaşları ofisin qapılarını bağlayaraq içəridə oturublar.
Ofisin ətrafında polislər və mülki geyimli şəxslər dayanıb. Onlar jurnalistlərin çəkiliş aparmasına icazə vermirlər.
Əməkdaşımız xəbər verir ki, polis əməkdaşları əraziyə əlavə qüvvə çağırıblar.
*****
14:36
Reportyorların azadlığı və təhlükəsizliyi İnsitutunun ofisini polis və mülki geyimli şəxslər mühasirəyə alıb.
Xəbəri musavat.com-a RATİ-nin əməkdaşları verib.
Onların sözlərinə görə, hazırda RATİ-nin önündə polis və mülki geyimli şəxslər var və onlardan bir neçəsi qapını qıraraq içəriyə daxil olmaq istəyirlər.
Ən son məlumatları paylaşacağıq.
