Bakı şəhəri Sabunçu rayonunda "Azəriqaz”ın əməkdaşlarının döyülməsi ilə bağlı cinayət işi başlanılıb.
Baş Prokurorluğun Mətbuat xidmətindən Xeberle.com-un sorğusuna cavab olaraq bildirilib ki, hadisə aprelin 19-da qeydə alınıb:
"Bununla bağlı bildiririk ki, aprelin 19-da "Azəriqaz” İB-in əməkdaşlarının ərazidə xidmət etdiyi zaman qaz xəttinin yerinin dəyişdirilməsi səbəbindən əməkdaşlardan biri- İlkin Əzizovun abonentlə mübahisəsi yaranması və abonentin qohumu olan Elnur Əliyevin həyətdən çıxaraq yumruqla onun çənə nahiyəsindən zərbə endirməsi barədə müraciət əsasında Sabunçu Rayon Polis İdarəsinin 12-ci Polis Şöbəsində araşdırma aparılıb.
Fakta görə Sabunçu Rayon Polis İdarəsinin İstintaq Şöbəsində Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə cinayət işi başlanıb.
Nəticəsi barədə ictimaiyyətə ətraflı məlumatın verilməsi təmin ediləcək".
Xatırladaq ki, "Azəriqaz” İstehsalat Birliyinin yaydığı məlumata görə, qurumun 4 əməkdaşı fiziki hücuma məruz qalıb.
Xəbərdən istifadə edərkən istinad etmək vacibdir.
