Azərbaycanın futbol üzrə milli komandasının başına gətiriləndən bəri ciddi uğur qazana bilməyən Canni De Byazi istefa vermək niyyətində deyil. Estoniya ilə heç-heçə bitən oyundan sonra mətbuat konfransı keçirən Byazi işini davam etdirəcəyini deyib.
"Özüm istefa verməyəcəyəm, buradayam, işimi davam etdirirəm. Məni ancaq qovsalar gedəcəyəm”, - deyən italiyalı baş məşqçi Azərbaycan millisində güclü futbolçuların olmadığını qeyd edib:
"Buradakı futbol cəmiyyətində nələrin baş verdiyini məndən yaxşı bilirsiniz. Qısa müddətdə belə az oyunçu ilə uğur qazanmaq asan deyil. Açığı, daha güclü millidən təklifim var idi. Sadəcə, bura ilə müqaviləm davam etdiyi üçün atıb getmək istəmədim”.
Məşhur futbol mütəxəssisinin açıqlaması maraqlı müzakirələrə səbəb olub. Futbol azarkeşlərinin bir çoxu hesab edir ki, De Byazinin istefası heç nəyi dəyişməyəcək. Səbəbinə gəlincə, Azərbaycanda uşaq futbolunun olmaması, indiyədək ayrılan dövlət vəsaitlərinin faydalı işlərə sərf edilməməsi göstərilir. Necə deyərlər, milyonlar arada əriyib gedib, nə futbolçu yetişdirilib, nə də normal məşqçi…
Bəs bundan sonra futbolumuzu ölü nöqtədən tərpətmək üçün hansı addımlar atılmalıdır?
Məsələ ilə bağlı Modern.az-a danışan Milli Məclisin Gənclər və idman komitəsinin üzvü Cəbi Quliyev ölkəmizdə yetərincə futbol məktəblərinin və mexanizmlərinin olmadığını deyib.
"Ölkəmizdə idmanın inkişafı ilə bağlı bir çox işlər görülür. Eyni zamanda, futbolun inkişafı ilə bağlı müxtəlif proqramlar icra olunub. Futbol çox geniş bir idman növüdür, yəni digərlərindən hər mənada fərqlənir. Çünki futbolçunun yetişməsi üçün böyük xərclər tələb olunur. Peşəkar futbolçuların yetişməsi üçün böyük futbol məktəbləri olmalıdır. İdman klublarımızın futbol məktəbləri olmalıdır. Düzdür, olanlar var, amma kifayət etmir. Biz beynəlxalq təcrübəni ölkəmizə gətirməliyik. Milli komanda istiqamətində mühüm addımlar atılmalıdır. Təəssüf ki, hər il ən az xal toplayan qruplarda olan komandalardan biri bizim milli komandamızdır. "Qarabağ” klubunun bir sıra uğurları var. Lakin milli komanda haqqında uğurlu nəticənin əldə olunduğunu deyə bilmərik. Ümumi futbol məsələsi həm ağır, həm də böyük prosesdir. Bununla bağlı AFFA, PFL tərəfindən ciddi iş getməlidir”, - deputat mövcud vəziyyəti dəyərləndirib.
Onun sözlərinə görə, ölkə futbolunun inkişafı üçün ciddi addımlar atılmalıdır:
"Nəhayət, uzun illərdən sonra PFL qərar verib ki, bizim liqamızda komanda sayı 10-u keçməlidir. Dünyanın heç bir yerində 4 dövrəli liqa yoxdur, bizdən başqa. Bizim komandalar 4 dövrəli liqada oynayırlar. Hər komanda il ərzində 4 dəfə bir-birilə qarşılaşır. Regionlarımızda futbolun inkişafı çox aşağı səviyyədədir. Naxçıvanda uzun illərdir "Araz-Naxçıvan” komandası Premyer Liqada təmsil olunmurdu. Bu da futbola marağın aşağı səviyyəyə salınmasına gətirib çıxarır. Ölkəmizdə cəmi 7 futbol məktəbi var. Bizdə Avropanın, yaxud dünyanın böyük futbol məktəblərinin heç biri yoxdur. Bizim istedadlı gənclərimiz var. Lakin onları üzə çıxaracaq mexanizm yoxdur. Problemin kökünü araşdırmaq üçün həm vaxt, həm də mexanizm lazımdır.
Bildiyimiz kimi, ötən il yerli komandalara müəyyən ianələri çatdırmaqla bağlı Futbolun İnkişaf Fondu yaradıldı. Amma nə qədər uğurlu oldu, bizə bəlli deyil. Bizdə futbol komandalarına baxırsan, sahibkarlar əlini çəkdiyi gün öz inkişafını dayandıracaq. Çünki komandaların maliyyə vəsaiti kifayət qədər olmadığına görə, onlar ciddi çətinlik çəkirlər”.
Azərbaycan millisinin sabiq baş məşqçisi Şahin Diniyev böyük futbolçuların böyük ölkələrdə yetişdiyini və ölkəmizin futbol ölkəsi olmadığını söyləyib.
"Böyük futbolçular böyük ölkələrdə yetişir. Burada kütləvilik böyük rol oynayır. Braziliya, Argentina, Portuqaliya, İspaniya, Almaniya, Fransa , İngiltərə kimi ölkələr futbol ölkələridir. Onların özlərinə məxsus ənənələri var. Bu ölkələrdə futbol kütləvidir. Amma bizim ölkəmizdə kütləvilik o qədər də yüksək hal almayıb. Eyni zamanda Azərbaycan futbol ölkəsi deyil. Ənənədən çox şey asılıdır. Keçmişdən indiyə qədər futbol ölkəsi olmamışıq. Sovet dövrünü nəzərə alsaq, Sovetlər birliyi də futbol məkanı olmayıb. Biz inkişaf tendensiyasından çox geri qalırıq”.
Tanınmış mütəxəssis Azərbaycandakı problemin futbol ənənəsinin olmaması ilə bağlı olduğunu düşünür:
"Hesab edirəm ki, bunun ən başlıca səbəbi ənənəmizin olmamasıdır. Ənənənin olması ulduzların yetişməsinə gətirib çıxarır. Ənənə və kütləvilik böyük rol oynayır. Çox təəssüf ki, biz futbol ölkəsi deyilik. 10 milyonun içərisində futbolun kütləviliyini artırmaq, yaxud yenidən nəyəsə baxmaq çox çətin görünür. Bu baxımdan peşəkar futbolçuların yetişməsi çətindir. Avropada ulduz futbolçular yetişir və tez bir zamanda tanınaraq məşhur olurlar. Bu səbəblə onların ustalığı da, profesionallığı da artır. Fikrimcə, bizdə bu cür peşəkar futbolçuların yetişməməsinə səbəb ölkəmizdə futbolçuların olmaması yox, kütləviliyin və ənənənin olmamasıdır”.
Futbol şərhçisi İsmayıl Abdullayev isə futbol akademiyalarının və meydançaların yetərli səviyyədə olmadığını diqqətə çatdırıb:
"Bizdə tarixən çox istedadlı futbolçular olub. Çox yüksək səviyyədə olmasa da, 1940 və 50-ci ildən bu yana baxsaq, Azərbaycan futbolunun doğrudan da çox yaxşı simaları, əfsanələri, unudulmaz futbolçuları olduğunu görə bilərik. Hazırda da çox güclü futbolçularımızın olduğunu düşünürəm. Sadəcə şəxslər müəyyən yaş həddinə qədər gəlib sonra sıradan çıxırlar. Bu da Azərbaycan psixologiyasından, təfəkküründən asılı olan bir şeydi, yəni istəsələr hər şeyi edə bilərlər. Biz hər dəfə deyirik ki, ölkəmizdə yetərli səviyyədə akademiyalar yoxdur. Akademiya güclü olmalıdır. Əsas problem odur ki, akademiya anlayışı demək olar ki, yoxdur”.
"Futbolçular uşaq yaşlarından akademiyada yetişməlidir. Akademiya bir növ internat məktəbi kimi olmalıdır. Uşaqlar təhsillərini orada almalı, qida, vitamin, dərmanla təmin olunmalıdır. Tamamilə futbola köklənməlidirlər. Bizdə hələ ki, belə akademiya yoxdur. Düzdür, yaxın gələcəkdə planlaşdırırıq. Amma hazırda yoxdur. Mənə elə gəlir ki, bu məsələ həll olunsa, problem aradan qalxacaq. Biz istədiyimiz futbolçuları arzuolunan səviyyədə görə biləcəyik. Meydançaları da buraya aid etmək olar. Futbol oynanılan meydançalara baxsanız görərsəniz ki, hansı vəziyyətdədir. Bu vəziyyətdə olan meydançalarda uşaqlar oynamamalıdır. Biz belə olan halda onları məhv edirik. Onlar bu meydançalarda travmalar, zədələr alırlar. Ümumilikdə problemlər bir-birilə zəncirvari bağlıdır. Bu məsələ aidiyyəti qurumlar tərəfindən yoluna qoyulmalıdır”, - deyə futbol şərhçisi qeyd edib.
Xəbərdən istifadə edərkən istinad etmək vacibdir.
