Mehdi Hüseynzadə adına Sumqayıt şəhər stadionu bir vaxtlar ölkənin ən yaxşı stadionu hesab olunurdu. Xüsusilə ideal ot örtüyü ilə Azərbaycanın 1 nömrəli idman arenası olub, tək yerli yox, həm də beynəlxalq oyunlara ev sahibliyi edib.

1963-cü ildə stadionun tikintisinə başlanılmış və 1966-cı il iyulun 1-də istifadəyə verilmişdi. Stadionda ilk oyunda SSRİ çempionatının "B qrupu"nda çıxış edən Sumqayıtın "Polad" komandası ilə Belaya Kolitva şəhərinin eyni adlı kollektivi üz-üzə gəlib. Görüş "Gənclik şəhəri" təmsilçisinin 1:0 hesablı üstünlüyü ilə başa çatıb. Həmin qarşılaşmada yeganə qolun müəllifi Telman Salahov olub. Stadionda ilk beynəlxalq oyun 1982-ci ildə Azərbaycanın yeniyetmələrindən ibarət komandası ilə İran millisi arasında olub. Bundan başqa, 1985-ci ildə U-20 yığmaları arasında dünya çempionatının Çin - Paraqvay oyunu da bu stadionda keçirilib. Sözügedən stadion həmçinin Azərbaycanda keçirilən ilk avrokubok oyunlarına ev sahibliyi edib.

1994-cü ildə "Turan” UEFA kuboku çərçivəsində Türkiyənin "Fənərbağça” klubunu məhz bu stadionda qəbul edib. Bir il sonra "Kəpəz” UEFA kuboku çırçivəsində Avstriyanın "Austriya”, "Neftçi” isə Kuboklar Kubokunda Cənubi Kiprin APOEL klublarını da Sumqayıt stadionunda qəbul edib. Ümumiyyətlə, müxtəlif vaxtlarda "Polad", "Vosxod", "Xəzər", "Kimyaçı", "Sumqayıt", "Gənclərbirliyi", "Qarabağ" (Ağdam), "Xəzər Lənkəran", "MKT Araz” və "Standard" komandaları ev oyunları Mehdi Hüseynzadə adına stadionda keçiriblər. Şəhərimizin baş arenası eyni zamanda 1993-cü oldə ölkə Superkubokuna, 2001-ci ildə isə ölkə kubokunun finalına ev sahibliyi edib. Olimpiya yığmamız da uzun illər ev oyunlarını bu stadionda keçirib.

Ancaq çox təəssüflə deməliyik ki, bu cür şanlı tarixə malik Mehdi Hüseynzadə adına Sumqayıt şəhər stadionu bu gün göz görə-görə dağılıb gedir. 1966-cı ildən sonra stadion 1979-1980-ci illər və 1993-1994-cü illər ərzində təmir olunub. Son olaraq isə 2011-ci ildə meydandançada kosmetik təmir işləri aparılıb. Ancaq təbii ki, bütün bunları ciddi iş saymaq olmaz. Hazırda arena çox bərbad gündədir. Taxta oturacaqlı tribunlar bir-bir sıradan çıxır. Əsas tribuna ilə üz-üzə olan və eləcə də qapı arxalarında yerləşən tribunlara isə çoxdan dağılıb gedib. İndi buralar sanki daş qəbirstanlığını xatırladır. 50 ildir salınmış ot örtüyü istismar müddətini çoxdan başa vurub. Sovet dövründən qalma qaçış çığırı haqqında da eyni sözləri demək olar. Elektron tablo hələ 2001-ci ildə burada təmir aparan qaynaqçıların məsuliyyətsizliyi ucbatından yanaraq kül olub. Tabolunun üstünü örtən "Sumqayıt” sizi salamlayır” plakatı da cırılaraq yararsız hala düşüb. Arenanın projektorları da heç bir işə yaramır. Hətta bu projektorlardan biri bir-neçə il bundan qabaq güclü küləyin təsiri nəticəsində aşıb. Nə qədər ironiyalı səslənsə də Sumqayıt stadionu hazırda dünyada 3 projektorlu yeganə stadion kimi tarixöə salına bilər. Xoşbəxtlikdən qış aylarına təsadüf edən həmin hadisədən itkisiz çıxmaq olmuşdu. Ancaq heç kim zəmanət verə bilməz ki, növbəti projektorun aşması itkisiz ötüşəcək.

Stadiondakı olimpiya məşəlinin isə sonuncu dəfə nə vaxt yandığını heç məşəl özü də xatırlamır. Rəsmi şəxslər üçün nəzərdə tutulan VİP loja və eləcə də şərhçi kabinələri də biabırçı gündədir. Ayaq yolundakı biabırçılıqdan isə heç danışmağına dəyməz. Bir sözlə, bir vaxtlar ölkənin ən baxımlı, ən gözəl arenalarından olan şəhərimizin stadionu çox bərbad durumdadır. 2013-cü ildə arenanın əsaslı təmirinə dövlət səviyyəsində qərar verildi, yeni proyekt də hazırlandı. Hətta tender də elan olundu və tenderin qalibi Polşa şirkəti oldu. Bütün smeta sənədlərio də hazırlandı. Qalırdı SOCAR tərəfindən vəsaitin ayrılması və işlərə start verilməsinə. Plana görə stadion sonradan 40 minə çatdırılmaq şərti ilə 15 min tamaşaçı tutumuna malik olmalı idi. Proyekt olaraq mükəmməl idi və 2015-ci ildə arena təhvil verilməli idi. Artıq 2015-ci ilin yarısı başa çatır. Ancaq nə pul ayıran var, nə də iş görən. Ortada isə gördüyünüz bu acı mənzərədən başqa heç nə yoxdur.

Anar
Xeberle.com

Yeni stadion isə belə olmalıdır