Bildiyimiz kimi, icra başçısı Zakir Fərəcov Sumqayıtda kadr siyasəti istiqamətində bir çox dəyişiklik və yeniliklərə imza atması ilə yadda qalır. Belə ki, Z.Fərəcov yeni rəhbər təyinatlarında əsasən sumqayıtlılara üstünlük verir və çıxışlarında çox zaman vurğulayır ki, Sumqayıtı sumqayıtlılar idarə etməlidirlər, təmənnasız işləyərək tez bir zamanda effektli işlər görməlidirlər. Hələlik onun şəhərin idarə və müəssisələrinə təyin etdiyi kadrlar da məhz həmin paramaterlərə cavab verir. Bəs görəsən təxminən 1 ay öncə tutduğu vəzifəsindən - Sumqayıt şəhər Gənclər və İdman Baş İdarəsinin rəhbərliyindən azad olunan Elşən Baxşəliyevin yerinə hansı namizədin təyin edilməsi daha inandırıcı görünür. Gəlin bu məsələ ilə bağlı kiçicik bir analiz aparaq.

Öncə vaxtilə uzun illər bu postu tutmuş və hazırda Sumqayıt şəhər Bələdiyyə sədrinin müavini Musa Həsənov variantına nəzər yetirək. Onun dövründə baş idarə bir sıra uğur və yeniliklərə imza atmışdır. O, Sumqayıt gənclərini yaxşı tanıyır və həmin gənclər arasında da Musa Həsənovun böyü nüfuzu var və olsun ki, bu namizədə yenidən şans verilərək Sumqayıt şəhər Gənclər və İdman Baş İdarəsinin əvvəlki nüfuzunu geri qaytarmaq istənilsin. Musa Həsənov əslən Kəlbəcər rayonundan olsa da, o, Sumqayıt sakinidir. Onun icra başçısı Zakir Fərəcovla yaxşı münasibətlərinin olduğu söylənilir.

Digər namizəd kimi Abşeron Rayon İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin baş məsləhətçisi Elgün Hümbətovun da adı hallanır. O, həmçinin YAP Abşeron Rayon Gənclər Birliyinin sədri vəzifəsini icra edir. Sumqayıt Bələdiyyəsinin sabiq sədri Əbülfəz Babayevin vəzifəsindən azad edilməsi hadisəsinə qədər məhz bu gəncin adı daha çox hallanırdı. Belə ki, Zakir Fərəcov onu Abşeronda işlədiyi zamandan - xeyli müddətdir ki, tanıyır və potensialına yaxşı bələdir. Elgün Hümbətov da sumqayıtlıdır və bu məqam onun şanslarını bir az da artırır.

Növbəti namizəd kimi sabiq boksçu, idman ustası, hazırda faktiki olaraq Gənclər və İdman Baş İdarəsinin rəisi vəzifəsini icra edən, buna qədər isə müavin postunda olan Mübariz Bəşirov göstərilir. Qeyd edək ki, idmanın inkişafında xidmətlərinə görə Mübariz Bəşirov "Tərəqqi” medalına layiq görülüb. Onu Musa Həsənovun layiqli davamçısı adlandırırlar. Xüsusən Sumqayıt idmançıları arasında böyük nüfuza malik olan M.Bəşirov bu sahədə zəngin təcrübəyə malikdir. O da Sumqayıt sakinidir və hazırkı statusu da – rəis vəzifəsinin aktiv şəkildə icrası, qısa müddətdə artıq bir neçə tədbirin təşkil edilməsi, onun şanslarının üsünə şans gətirir.

Elşən Baxşəliyev vəzifəsindən təzə azad olunanda "168 saat” qəzetinin baş redaktoru Vüsal Məmmədovun da adı hallanmağa başlamışdı, hətta Sumqayıtda şayiə də yaranmağa başlamışdı ki, V.Məmmədovun gənc və perspektivli kadr kimi hər cür şansları var. Şəhər gənclərini yaxşı tanıyır. Bundan öncə Azərbaycan Televiziyasında siyasi təhlilçi, Sumqayıt Dövlət Universitetində mətbuat və informasiya Şöbəsinin müdiri vəzifələrini tutub, AMEA-nın Əlyazmalar İnstitunun dissertantıdır. Sumqayıt sakinidir. O, həmçinin Sumqayıtda gənclərlə bağlı bir sıra layihələrin müəllifi və həmmüəllifi olub.
Hər halda, kimin rəhbər olmasının önəmi böyük deyil. Ola bilər ki, tam ayrı bir namizəd də olsun. Önəmli olan budur ki, həmin şəxs böyük ürəklə və tam gücü ilə bu işdə yararlı olsun! Sumqayıt gəncliyinə, həmçinin idmançılarımıza əsl dayaq olsun!

Xeberle.com