Çempionlar Liqasının qrup mərhələsində "Qarabağ"ın rəqiblərindən olan "Roma" heyətlə bağlı problemlə üzləşib.
"Canavarlar"ın iki futbolçusu komandadan ayrı düşüb.
Bunlar yarımmüdafiəçi Radca Nainqqolan və hücumçu Patrik Şikdi.
İtaliya A seriyasının IV turunda "Verona" ilə qarşılaşmada (3:0) zədələnən hər iki oyunçu qarşıdakı matçlarda meydana çıxmayacaq.
Maraqlıdı ki, Nainqqolan 75-ci dəqiqədə zədələnərək, yerini məhz Şikə verib. Belçikalı ilə müqayisədə çexiyalı forvardın durumu daha ciddidi. Paytaxt təmsilçisinin sabah "Benevento", sentyabrın 23-də isə "Udineze" ilə baş tutacaq görüşlərində baş məşqçi Eysebio di Françesko adıçəkilən futbolçuların xidmətindən yararlana bilməyəcək.
Nainqqolanın Çempionlar Liqasında "Qarabağ"la qarşıdakı matçda iştirakı gözlənilirsə, Şikin Bakıya səfərinin baş tutub-tutmayacağı həkimlərin qərarından asılı olacaq.
Qeyd edək ki, "Qarabağ" - "Roma" oyunu sentyabrın 27-də keçiriləcək. (apasport.az)

Xəbərdən istifadə edərkən istinad etmək vacibdir.