Bu gün Naxçıvan Olimpiya Kompleksində veteran futbolçulardan ibarət komandaların ölkə birinciliyinə yekun vurulmuşdur. Buna qədər Masallı, Oğuz, Qəbələ və Bakıda baş tutan zona yarışlarında uğurlu nəticələr qazanan Sumqayıt veteranları həlledici mərhələdə də qalib olublar.
“Sumqayıt” Futbol Klubunun mətbuat xidmətindən AzərTAca verilmiş məlumata görə, əvvəlcə “Qarabağ”ı 7:4 hesabı ilə üstələyən veteranlarımız həlledici görüşdə “Neftçi”yə qalib gəlmişlər (5:2). Final görüşündə qolları “Sumqayıt” Futbol Klubunun baş məşqçisi Aqil Məmmədov, Mübariz Orucov, İsmayıl Məmmədov, Kamal Quliyev və Kənan Məmmədov vurublar.
Qeyd edək ki, 3-cü yer uğrunda görüşdə “Qarabağ” və “Kəpəz” qarşılaşıblar. “Qarabağ”ı 5:4 hesabı ilə məğlub edən “Kəpəz” 3-cü yerə sahib çıxıb.