“Bakı”nın transferə çıxardığı Kamran Ağayev ciddi problemlə üzləşib. Hafta.az saytının məlumatına görə, “zolaqlılar”ın xidmətinə ehtiyac duymadığı millimizin qapıçısına yaxın duran yoxdur. 

Ağayevin “Bakı”da “qara siyahı”ya düşdükdən sonra “Qəbələ”yə transfer olunacağı gözlənilirdi. Lakin “qırmızı-qaralar”ın 2 əsas qapıçısı – David Pietrzkeviçlə Dieqo Kostanın olduğunu, dünən isə “Sumqayıt”ın qolkiperi Anar Nəzirovun olduğunu nəzərə alsaq, Ağayevin yolu bağlanıb.

Əldə etdiyimiz məlumata görə, Kamran iş üçün “Neftçi”nin qapısını döyüb. Ancaq “ağ-qaralar”dan məyusedici cavab alıb. Bildirilib ki, bizim Saşa Stamenkoviçlə Pavel Doroşevimiz var, özünə başqa sığınacaq axtar.

Nizam-intizam qaydasını pozduğu üçün baş məşqçi Milinko Pantiçin İspaniya toplanışına aparmadığı millimizin qapıçısının aqibətinin necə olacağı maraq doğurur. Görəsən, Kamrana kim qapı açacaq?

Bu, dəqiq “Xəzər Lənkəran” olmayacaq. Ağayev “ağ-yaşıllar”dan problemi bir şəkildə ayrılıb. Bosniyalı İbrahim Şehiçi yenicə transfer edən, heyətində Fərhad Vəliyevlə Osman Umarovun olduğu “Qarabağ”ın da Kamrana yaxın durması mümkünsüz görünür.

“İnter”lə “Simurq”un problemli futbolçulardan uzaq durmaları bir yana, “qardaşlar”ın hazırda qapıçıya ehtiyac duyduqları yönündə bir xəbərə rast gəlməmişik. Digər tərəfdən, “bankirlər”in Ağayevə qoyulan və 450 min manat olduğu söylənilən təzminat məbləğinin ödəyəcək səviyyədə olmamaqları hər kəsin məlumudur. O da məlumdur ki, AZAL-la “Rəvan”ın da bu cür iri çaplı transferi reallaşdıracaq durumda deyillər. 

Bəs Ağayev harada oynasın? Kamranın hərbi xidmətlə bağlı problemini həll etmədiyi üçün xarici klublarda forma geyinmək imkanının olmadığını nəzərə alsaq, bir variant qalır – “Sumqayıt”!