Onun milli ilə adı çoxdan hallanırdı. Hələ Berti Foqtsun dönəmində hər dəfə almaniyalının baş məşqçi vəzifəsindən ayrılması gündəmə gələndə onun vakant qoyacağı posta futbol ictimaiyyəti tərəfindən ən real namizəd kimi məhz Qurban Qurbanovun adı səsləndirilirdi. Həmin vaxt Qurbanovu bu vəzifə üçün "gənc” adlandıran AFFA prezidenti Rövnəq Abdullayev Foqtsu vəzifəsində saxlamış, onun gedişindən sonra isə Robert Prosineçki ilə anlaşmışdı. Xorvat mütəxəssisin yığma komandamızdan ayrılmasından sonra isə millinin baş məşqçisi postuna yeganə namizəd kimi məhz Qurbanov qalmışdı və gözlənildiyi kimi yığmanın yeni çalışdırıcısı da məhz Qurbanov oldu. Amma bu təyinat heç də birmənalı qarşılanmadı. Qurban Qurbanovun millinin "sükanı arxası"na gətirilməsini AFFA-nın məkirli planının tərkib hissəsi sayanlar da var, bu qərarı ən düzgün addım hesab edənlər də.
AFFA Qurbanı "qurban" edir?
Şübhəsiz, bu təyinata qarşı çıxanların əlində iki əsas var. Birincisi, Qurban Qurbanovun həm millini, həm də "Qarabağ"ı eyni anda çalışdırmasının düzgün olmadığı qeyd olunur. Yəni mövcud durumda 45 yaşlı mütəxəssis nə yığmada, nə də klubda tam gücü ilə işləyə bilməyəcək ki, bu da yaxşı sonluq vəd etmir. Digər məsələ isə ölkənin ən yaxşı məşqçisi sayılan Qurbanovun uğur qazanmaq imkanlarının geniş olmadığı milli komandadakı nəticələr fonunda nüfuzunu itirmək ehtimalıdır. Hər halda Azərbaycan seçmə komandasının potensialı bəllidir və hazırkı vəziyyətdə dünya və ya Avropa çempionatına vəsiqə qazanmaq real hədəf kimi görünmür. Bu məsələdə daha bir iddia isə Qurbanovun uğurlarının AFFA-da qıcıq yaratmasıdır. İlk baxışdan inandırııcı səslənməsə də, bu tip söz-söhbətlər yeni bir şey deyil. Deyilənlərə görə, AFFA rəhbərliyi Qurbanın nüfuzunu və xərclənən milyonlara rəğmən, uğur qazanmayan yığmanın fonunda "Qarabağ"da tarix yazmasını qısqanırdı. Onun daha əvvəl seçmə komandaya təyinat almaması da məhz bununla bağlı idi. "Qurbanov milli ilə də uğur qazansa, ölkə futbolunun inkişafı onun adı ilə bağlı olacaq və AFFA bunu istəmir. Bu təyinatda əsas məqsəd də mütəxəssisi nüfuzdan salmaqdır" kimi fikirlər uzun müddətdi ölkənin futbol ictimaiyyətində dolaşmaqdadır.
Niyə məhz Qurbanov olmalıydı?
Hər ölkənin özünəməxsus futbol ənənələri var və həmin ənənələr istər-istəməz həmin ölkənin yığma və klub komandalarında özünü göstərir. Bu səbəbdən milli komandanın "sükanı arxası"na Qurbanovun gətirilməsini düzgün addım saymaq olar. Əgər bu, "Qarabağ"ı çalışdıran Qurbanovdursa, bunu ikiqat düzgün seçim kimi qiymətləndirməliyik. Düzdür, baş məşqçinin kimliyindən asılı olmayaraq, əsas yığmamızdan ciddi uğur gözləmək eyforiyaya qapılmaqdır, amma əvvəlkindən daha yaxşı çıxış edəcəyimizdən ümidsiz olmağa da lüzüm yoxdur. Ən azı ona görə ki, "köhlən atlar" yığmanın əsas "donor"udur. Yığma komandaya hamıdan çox oyunçu verən Ağdam təmsilçinin üzvləri həm oyun, həm də qol sayında digərlərini qabaqlayır. Son seçmə mərhələdə əsas yığmada 11 oyunçu ilə təmsil olunan "Qarabağ"ın üzvlərindən Qara Qarayev, Rahid Əmirquliyev və Ramil Şeydayev bütün oyunlarda, Bədavi Hüseynov və Əfrran İsmayılov 8, Rəşad Sadıqov 7, Maksim Medvedev 6, Ağabala Ramazanov və sonradan milliləşdirilən Riçard Almeyda 5, Arif Daçdəmirov 4, Mahir Mədətov isə 2 qarşılşmada forma geymişdi. Prosineçkinin komandasının biri avtoqol olmaqla vurduğu 10 qoldan 6-sına məhz "Qarabağ"lılar imza atmışdı. Əfran İsmayılov üç dəfə fərqləndiyi halda, Rəşad Sadıqov, Maksim Medvedev və Ramil Şeydayev hərəyə bir dəfə qol sevinci yaşamışdı.
Yığmanın əsas heyətinin əksər üzvlərindən təşkil olunan kollektivdə iş təcrübəsi, millinin özəyini təşkil edən oyunçuları yaxşı tanıması əsas üstünlükdür. Məsələn, Elvin Məmmədovla Vaqif Cavadovun Qurbanovun sərəncamında olarkən millidə sərgilədiyi oyunla indiki vəziyyəti yada salsaq əlavə şərhə ehtiyac qalmır. "Zirə"nin heyətində top qovan Elvin Məmmədov milli üçün çoxdan ikinci plana keçibsə, Vaqif Cavadov ümumiyyətlə top qova bilmir. Klubsuz günləri davam edən Cavadovun "Qarabağ"dan ayrıldıqdan sonra nə Rusiaya "Volqa"sında, nə də AZAL və "Sumqayıt"dakı çıxışı gözlənilən effekti verdi. Artıq uzun illərdir "Qarabağ"a rəhbərlik edən Qurbanovun müəyyənləşdirdiyi oyun üslubu və kadr siyasəti fonunda irəlləyişə nail olması danılmazdır.
Bəs "Qarabağ"?
İndiki durumda futbol ictimaiyyətinin düşüncəsini bu təyinatın "Qarabağ"a necə təsir edəcəyi sualı məşğul edir. Hər halda "bir əldə iki qarpız tutmağ"ın çətinliyi öncədən məlumdur və belə vəziyyətdə klubun "çəki"sini saxlayacağına heç kim təminat vermir. Digər yerli klubların fiaskosu fonunda Çempionlar Liqasının qrup mərhələsinə vəsiqə qazanan "köhlən atlar"dan uğur davamlı gözləyənlər isə heç də az deyil. Hər nə qədər çətin olsa da, iki cəbhədə işləməli olacaq Qurbanov bunu bacara bilər. "Qarabağ"da oturuşmuş sistemin olması, Azərbaycan çempionatında bu kluba ciddi əngəl törədəcək rəqibin olmaması və ən əsası yığma komandamızın AVRO-2020-nin seçmə mərhələsinin startına kimi rəsmi oyuna çıxmayacaq olması 54 yaşlı mütəxəssisin işini asanlaşdıran məqamlardandır.
Tural Məmmədov
Xeberle.com
