Çempionlar Liqasının III təsnifat mərhələsinin cavab oyunu çərçivəsində bu gün Abstriyadakı "Red Bull Arena"da "Zalsburq" - "Qarabağ" oyunu keçiriləcək.Modern.az-ın məlumatına görə, oyun Bakı vaxtı ilə saat 23:30-da başlayacaq.Oyunu şotlandiyalı hakimlər briqadası idarə edəcək.

Avstriyada keçiriləcək oyunun baş hakimi Robert Madden olacaq. Ona həmyerliləri Qraham Çambers və Alastair Mazer köməklik edəcəklər. Dördüncü hakim funksiyasını isə Brian Kolvin yerinə yetirəcək.

"Qarabağ" klubunun baş məşqçisi Qurban Qurbanov oyun öncəsi qarşılaşmanın çox çətin keçəcəyini deyib:

“İlk oyunda qələbə qazanmışıq, cavab matçında favorit kimi “Zalsburq” klubu göstərilir, bu da rəqibin nə qədər ciddi olduğunu ortaya qoyur. Son günlərdə ölkəmizdə çox ağır hadisələr baş verir və təbii ki bu hamımızı məyus edir. Amma çalışacağıq ki, komandamız bu hadisələrdən təsirlənməsin. Bir sıra itkilərimiz var,  ona görə də müdafiədə çox diqqətli oynamağa çalışacağıq. İlk oyunda azarkeşlərimizin möhtəşəm dəstəyi var idi. Cavab matçında çox ehtimal “Zalsburq” azarkeşləri də komandalarını daha çılğın formada dəstəkləyəcək. Son olaraq bunu deyim ki, biz Avstriyaya məğlub olmaq üçün gəlməmişik”.

Qeyd edək ki, 30 iyulda  Bakıda baş tutan ilk görüşdə "Qarabağ"ımız 2:1 hesabı ilə qələbə qazanmışdı. Komandamız güclü “Zalsburq”la oyunda uğurlu nəticə qazanmaqla play-off mərhələsinə yüksələ bilər. Bu, baş verərsə,  Qurban Qurbanovun komandası Azərbaycan futbolu tarixinə düşəcək. Çünki indiyədək klublarımızdan heç biri Çempionlar Liqasının play-off mərhələsinə yüksələ bilməyib.