Bu gün AFFA-da qurumun baş katibi Elxan Məmmədovla “Qarabağ”ın futbolçusu Reynaldo Silva arasında görüş keçirilib. 

Qol.Az-ın xəbərinə görə, "Qarabağ"ın baş məşqçisi Qurban Qurbanovun da iştirak etdiyi görüşdə Reynaldo Silvanın Azərbaycan millisində oynaması ilə bağlı məsələ müzakirə edilib. 

Müzakirələr zamanı E.Məmmədov AFFA rəhbərliyi adından R.Silvaya millimizdə oynamaqla bağlı rəsmi təklif irəli sürüb. Futbolçu təklifi qəbul edib.

“Qarabağ”ın mətbuat xidmətinin rəhbəri Nurlan İbrahimov Qol.Az-ın müxbiri ilə söhbətində görüşün keçirilməsi xəbərini təsdiqləyib.

Onun sözlərinə görə, AFFA Brazilya vətəndaşlığı olan Reynaldoya Azərbaycan pasportunun verilməsi ilə bağlı müvafiq qurumlara müraciət edəcək. Eyni zamanda məsələ ilə əlaqədar FİFA-ya da müraciət olunacaq.

AFFA-nın Mətbuat və İctimaiyyətlə Əlaqələr Departamentinin rəhbəri Mikayıl Nərimanoğlu da Qol.Az-a görüşün keçirildiyini təsdiqləyib. Amma o, danışıqların təfərrüatı haqda açıqlama verməyib