Azərbaycan Premyer Liqasının yayım hüququ "İdman-Azərbaycan" telekanalından alınacaq. Hər halda, hazırda bu məsələ müzakirə olunur. Bildiyiniz kimi, sözügedən telekanal hazırda çempionatın yayım hüququna malik yeganə telekanaldır. Lakin bu telekanalın fəaliyyəti böyük əksəriyyəti qane eləmir. "İdman-Azərbaycan" və AZTV birlikdə götürsək, heç oyunların 50 faizini belə, yayımlamırlar. Məsələn, dünən 14-cü turun son və eyni zamanda mərkəzi görüşü keçirildi. Son çempion və ölkəmizin avrokuboklardakı yeganə təmsilçisi "Qarabağ" turnir cədvəlində dördüncü pillədə qərarlaşan "Simurq"la üz-üzə gəlirdi. "İdman-Azərbaycan" isə çempionatın mərkəzi görüşünü vermək əvəzinə "Azəryol"la "Rabitə" arasındakı voleybol oyununu yayımladı ki, bu da futbol ictimaiyyəti arasında böyük narazılığa səbəb oldu.
Rekord.az-a etibarlı mənbədən daxil olan məlumata görə, bu narazılıqlara son qoymaq üçün gələn mövsümdən çempionatın yayım hüququnun yeni yaradılmış Klublar Komitəsinə veriləcəyi gözlənilir.

Belə deyək, yayım hüququ yenidən klublara qaytarılacaq və klublar ev oyunlarını yayımlamaq üçün özləri ürəkləri istəyən telekanalla razılığa gələcəklər. Belə olarsa, hər turun bütün oyunlarını müxtəlif telekanallarda izləmək imkanımız olacaq.