Bildiyiniz kimi, U-17 millisi "Əlincə” Futbol Klubunun Masazırda yerləşən təlim-məşq bazasında hazırlıq keçir. Biz də fürsətdən istifadə edib U-17-yə yeni cəlb olunan serbiyalı həkim Sead Maliçeviçlə ayaqüstü söhbətləşdik.

Bazada yaradılan şəraitdən ağızdolusu danışan "ağ xələt” təmsilçisinin təəssüratları belə oldu: "Özüm uzun illər Serbiyanın "Partizan” klubunun həkimi işləmişəm. U-17 millisində yenicə işə başlamışam. Masazırda  keçirilən bu təlim-məşq toplanışı məndə məmnunluq hissi oyadır. Açığı, əvvəlcədən belə bazaya gələcəyimizi təsəvvür etmirdim. Amma indi gördüklərim futbol adına məni çox sevindirir. Meydançalar, hotel və sakit bir məkanda hazırlıq keçmək hər bir komanda üçün arzuolunandı.  Klubların, müxtəlik yaş qrupları üzrə yığmaların təlim-məşq toplanışı keçməsi üçün Masazırda hər cür şərait var. Hətta deyərdim ki, bu bazada müxtəlif səviyyəli turnirlər də təşkil etmək olar. Digər bir məqam isə "Əlincə” Futbol Klubunun bazasının Masazır duz gölünün yaxınlığında yerləşməsidi. Həkim olduğumdan bu məqam daha çox diqqətimi çəkdi. Yodla bol olan gölün sahilində, təmiz havada məşq keçmək idmançılar üçün çox əlverişlidir”. (rekord.az)