Ölkəmizin hasil etdiyi neftin 2 milyard tona çatması SOCAR-ın "Azərikimya” İstehsalat Birliyində təntənə ilə qeyd olunub. Bu münasibətlə noyabrın 7-də keçirilən tədbirdə kimyaçılarla bərabər, Sumqayıt ictimaiyyətinin nümayəndələri də iştirak edib.
İstehsalat Birliyindən Xeberle.com-a bildirilib ki, tədbirdə çıxış edənlər Azərbaycan neft sənayesinin inkişaf tarixindən söz açıblar. Qeyd olunub ki, bu günlərdə respublikamızda neft hasilatı 2 milyard tona çatıb və bu, hər bir Azərbaycan vətəndaşının qəlbində qürur və fəxarət hissi oyadır.
Vurğulanıb ki, ulu öndər Heydər Əliyevin uzaqgörən siyasəti nəticəsində 1994-cü ildə "Əsrin müqaviləsi”nin imzalanması ölkəmizə böyük sərmayə qoyuluşunun cəlb edilməsi baxımından tarixi nailiyyətdir və neft sənayesinin xüsusi bir mərhələsini təşkil edir. Azərbaycan investisiya qoyuluşuna görə MDB məkanında ön sıralarda qərarlaşıb. 1995-ci ildən bu günə qədər ölkə iqtisadiyyatına 200 milyard dollardan artıq investisiya qoyulub ki, bu investisiyaların da yarıdan çoxu neft-qaz sektorunun payına düşür.
Sonrakı illərdə Bakı-Tbilisi-Ceyhan neft və Bakı-Tbilisi-Ərzurum qaz kəmərlərinin istismara verilməsi, bu günlərdə Bakı-Tbilisi-Qars dəmir yolu xəttinin açılışı ölkə həyatı üçün mühüm hadisələrdir.
Tədbirdə çıxış edən "Azərikimya” İstehsalat Birliyinin Müşahidə Şurasının sədri, Milli Məclisin deputatı Muxtar Babayev respublikamızda həyata keçirilən beynəlxalq neft-qaz layihələrindən danışıb, iştirakçıları əlamətdar gün münasibətilə təbrik edib.
Xəbərdən istifadə edərkən istinad etmək vacibdir.
