Biznes quranlara və avtomobil əldə etmək istəyənlərə bir tövsiyə vermək istərdim ki, yubanmadan elektromobilləri seçin.
Belə bir təkliflə hüquqşünas, yol-nəqliyyat eksperti Ərşad Hüseynov çıxış edib. Ə.Hüseynov bildirib ki, avtomobil həvəskarlarından və biznesmenlərdən kim qabağa düşsə, udmuş olacaq:
"Lap yaxın perspektivdə bütün dünyada onlar populyar olacaq. Kim qabağa düşsə, udacaq. Nəzərə alın ki, hazırda ölkəmizə avtomobil idxalı ilə bağlı aksiz vergisi və gömrük rüsumu mühərrikin iş həcmi ilə hesablanır. Elektromobildə isə daxili yanma mühərriki olmadığından həmin vergi və rüsumlar yox dərəcəsindədir. Sadəcə olaraq onlara texniki qulluq infrastrukturu və enerji təminatını qurmaq, bu nəqliyyatı populyarlaşdırmaq lazımdır”.
Ekspert hesab edir ki, hələlik belə avtomobillər baha olsa da, inkişaf ucuzlaşmaya doğru gedəcək:
"Bu labüddür. Şəxsən mən hələ 9 il öncə indi istifadə etdiyim avtomobili alanda dostlara yarızarafat demişdim ki, növbəti avtomobilim, qismət olsa, elektromobil olacaq. İndi baxıram ki, bu gerçəkliyə oxşamağa başlayıb.
Nəzərə alın ki, ölkəmizdə avtomobilləşmə səviyyəsi cəmi 15% civarındadır. Potensial olaraq bu rəqəm 60%-ə çata bilər. Yəni ölkəmizin avtomobilləşməsi hələ qabaqdadır”.(Axar.az)

Xəbərdən istifadə edərkən istinad etmək vacibdir.