Bir çox ölkələrdə Yeni il zamanı evlərdə süni deyil, təbii ağaclardan yolkaların quraşdırılmasına üstünlük verilir.
Xeberle.com Trend-ə istinadən xəbər verir ki, sözsüz ki, təbii yolkanın görünüşü insanda daha xoş təəssürat yaradır. İnsanların ona üstünlük verməsinin səbəbi həm də təbii yolkaların daha ucuz başa gəlməsi olur.
Məsələn, bu yaxınlarda Rusiyada əhalinin maddi vəziyyəti nəzərə alınaraq, eyni zamanda, qanunsuz halların qarşısını almaq üçün imkanı çatmayan şəxslərə meşələrdən iynəyarpaqlı ağac kəsməyə icazə verilməsi ilə bağlı təklif irəli sürülüb.
Rusiyada Meşə Məcəlləsinə təklif edilən dəyişikliyə əsasən, hər bir insan meşəbəyliyə müraciət edərək ağacın kəsilməsi üçün icazə ala bilər. Ağacın dəyəri isə onun uzunluğundan asılı olaraq dəyişəcək. Ağacın hər metrinin insanlara 200 rubla (təxminən 5-6 manata) təklif edilməsi nəzərdə tutur.
Bazarda süni yolkanın qiymətinin daha yüksək olduğu nəzərə alınarsa, bu, Yeni ili yolka ilə qeyd etmək istəyənlər üçün ən səmərəli variant ola bilər. Qeyd edək ki, hazırda Azərbaycanda 1 metrlik süni yolkalar 60-90 manata satılır.
Ekologiya və Təbii Sərvətlər Nazirliyinin (ETSN) Meşələrin İnkişafı Departamentinin sektor müdiri Sadiq Salmanov deyib ki, Azərbaycanın qanunvericiliyi şəxslərə meşələrdən özbaşına ağac kəsməyə icazə vermir. Lakin təbii yolka quraşdırmaq istəyənlər ETSN-nin Meşə Mühafizəsi və Bərpası müəssisəsilərinə müraciət edərək oradan ting ala bilərlər: "Meşələr əhəmiyyətinə görə 3 qrupa bölünür. I qrupa əsasən suqoruyucu, torpaqqoruyucu, səhiyyə-gigiyena və sağlamlıq funksiyası daşıyan meşələr daxildir. I qrupa daxil olan meşələrdə ağaclar yalnız sanitar vəziyyətinə görə kəsilir. II qrup meşələrdə başdan-başa, tədrici və seçmə qırıntısına icazə verilir. III qrup meşələr çoxmeşəli rayonlarda yerləşir və burada başdan-başa qırıntı üsulları tətbiq edilir, tam istismara verilir. Rusiyada meşələr çoxdur, onların meşələri sənaye əhəmiyyətlidir. Rusiya iqtisadiyyatının 15 faizini elə meşə sənayesi təşkil edir. Ona görə də Rusiya ilə Azərbaycanı eyniləşdirmək düzgün deyil. Bizim meşələr əhəmiyyətinə görə I qrupa aid olduğundan burada Rusiyadakı kimi sənaye əhəmiyyətli qırıntılar aparılmır. Azərbaycanda əsas enliyarpaylı meşələr var. Amma buna baxmayaraq, bizdə şam, sərv və s. tingləri də yetişdirilir. Yeni ildə müraciət edildikdə pulu ödənilmək şərti ilə ting ala bilərlər”.
S.Salmanov deyib ki, tinglərin biri insanlara boyundan asılı olaraq, təxminən 2-5 manata təklif edilir.
Qanunvericilikdə də ting satışının nəzərdə tutulduğunu deyən nazirlik rəsmisi əlavə edib ki, ETSN-nin həm ting müəssisələri var, həm də Meşə Mühafizəsi və Bərpası müəssisələrinin ərazilərində tinglik üçün sahələr mövcuddur: "Tinglər lazım olan miqdarda meşə bərpası işlərinə sərf edilir. Artıq qalan isə əhaliyə və təşkilatlara satılır. Meşə Məcəlləsində də bu nəzərdə tutulur. Ona görə də istənilən şəxs ting almaq üçün müraciət edə bilər”.

Xəbərdən istifadə edərkən istinad etmək vacibdir.