Nazirliyin ictimaiyyətlə əlaqələr şöbəsindən Xeberle.com-a verilən məlumata görə, Dövlət Əmək Müfəttişliyi Xidmətinin, onun 7 nömrəli region üzrə Dövlət Əmək Müfəttişliyinin və Sumqayıt şəhəri üzrə 20-dək işəgötürənin nümayəndələrinin iştirakı ilə keçirilən tədbir əmək qanunvericiliyi və onun tətbiqi ilə əlaqədar sahibkarların məlumatlandırılması məqsədi daşıyıb.

Tədbirdə Xidmətin rəis müavini Anar Quliyev əmək münasibətlərinin tənzimlənməsinin müqavilə üsullarının əsas hüquqi formaları kimi çıxış edən kollektiv müqavilə və sazişlərin bağlanılmasının ümumi qaydaları barədə işəgötürənlərin geniş maarifləndirilməsinin böyük əhəmiyyət daşıdığını bildirib. "Azərkimya” İstehsalat Birliyi icraçı direktorunun müavini Vüqar Kərimov işəgötürənlər arasında təşkil olunan tədbirin vacibliyi, Dövlət Əmək Müfəttişliyi Xidmətinin 7 nömrəli region üzrə Dövlət Əmək Müfəttişliyinin baş əmək müfəttişi Şahin Hacıyev kollektiv müqavilə və sazişlərin bağlanılmasının ümumi qaydaları barədə məlumat verib. Bildirilib ki, yazılı formada bağlanan kollektiv müqavilənin bir tərəfi işəgötürən, digər tərəfi həmkarlar ittifaqı təşkilatı, müəssisədə həmkarlar ittifaqı təşkilatı olmadığı halda ikinci tərəfi əmək kollektividir. Bu, işəgötürənlə işçilər arasında əmək, sosial-iqtisadi, məişət və digər münasibətləri tənzimləyən hüquqi aktdır və kollektiv müqaviləni pozmağa görə müəssisənin vəzifəli şəxsləri intizam məsuliyyətinə cəlb edilirlər.

Kollektiv müqavilənin hazırlanması və bağlanılmasının qaydaları, onun məzmunu və qüvvədə olma müddəti, həmin müqaviləyə əlavə və dəyişikliklər edilməsi, yerinə yetirilməsinə nəzarətin həyata keçirilməsi ilə əlaqədar qayda və prinsiplər diqqətə çatdırılıb. Eyni zamanda, kollektiv saziş (müvafiq icra hakimiyyəti orqanı, həmkarlar ittifaqları və işəgötürənlərin birlikləri arasında bağlanan, işçilərin əmək və sosial müdafiə hüquqlarının təmin olunması üzrə tədbirlərin təşkilində birgə fəaliyyətə dair tərəflərin öhdəliklərini müəyyən edən razılaşma), onun hazırlanması və bağlanılması qaydaları və s. barədə məlumat verilib. Həmin sənədlərin bağlanması və onlarda dəyişikliklər edilməsi üçün kollektiv danışıqlar aparılması ilə bağlı qanunvericiliyin prinsipləri qeyd olunub.

İştirakçıların suallarının cavablandırılması ilə davam edən tədbirdə "Azərkimya” İstehsalat Birliyinin kadr şöbəsinin böyük müfəttişi Reyhan Cəbiyeva, Sumqayıt şəhər Səhiyyə şöbəsinin Həmkarlar Təşkilatının sədri Elmira Quliyeva, "Azərtexnolayn” MMC-nin insan resursları şöbəsinin müdiri Həbib Vəliyev və başqaları çıxış edərək müəssisələrində kollektiv müqavilənin bağlanması ilə bağlı mövcud təcrübə, ümumən əmək qanunvericiliyinin tətbiqi sahəsində görülən işlərlə əlaqədar fikirlərini bölüşüblər.