Yerli özünüidarə qurumlarının fəaliyyətindən razı olanlar da var, narazı qalanlar da

Azərbaycan bələdiyyə sistemi sayca dördüncü seçkini də arxada qoydu. Birinci seçkidən keçən 15 il ərzində bu bələdiyyə institutu kimlərsə tərəfdən tənqidlərə, kimlərsə tərəfdən isə təqdirlərə məruz qaldı.

Qeyd edək ki, yeni yaradılanda Azərbaycanda bələdiyyələrin sayı 2757 idi. 2009-cu ildə bir sıra xırda bələdiyyələrin birləşdirilməsi prosesi həyata keçirildi və bundan sonra yerli özünüidarə orqanlarının sayı 1762-dək azaldıldı. Naxçıvan MR-də isə birləşmə nəticəsində bələdiyyələrin ümumi sayı 215-dən 171-ə düşdü. Ümumilikdə ölkə üzrə aparılan birləşmə tədbirləri nəticəsində yerli özünüidarə qurumlarının sayı 2757-dən 1718-ə qədər azaldılıb. Bu proses nəticəsində 1044 bələdiyyə ixtisar olunub, 5-i isə yaradılıb. Bu isə son nəticədə 1039 və ya 38 faiz bələdiyyənin azalması deməkdir.

Sumqayıt bələdiyyəsi: kimlər gəldi, kimlər getdi?
Azərbaycanda böyük şəhər bələdiyyələrindən biri də Sumqayıt şəhər bələdiyyəsidir. Sumqayıt şəhər bələdiyyəsi 12 dekabr 1999-cu il tarixində yaradılıb. Ərazisi 7829,80 ha-dır. Əhalisi 357.9 min nəfərdir. Məcburi köçkün və qaçqınların sayı 62.3 min nəfərdir.

Bələdiyyənin saytında yerləşdirilən məlumata görə, icra aparatı əməkdaşlarının sayı 82 nəfərdir. Bələdiyyə üzvləri isə 19 nəfərdir. Sumqayıt şəhər bələdiyyəsinin yerli büdcə məsələləri, yerli sosial məsələləri, yerli iqtisadi inkişaf və yerli ekologiya məsələləri, bələdiyyə və şəhər təsərrüfatı məsələləri, ictimai və qeyri-hökumət təşkilatları məsələləri, hüquq və intizam məsələləri və investisiya, yeni texnologiyalar və istehsal məsələləri daimi komissiyaları fəaliyyət göstərir. Bələdiyyənin İcra aparatında isə ümumi, təşkilat, yerli vergilər, memarlıq və tikinti, maliyyə və mühasibatlıq, bələdiyyə mülkiyyətinin idarəetmə və hüquq şöbələri var. Bələdiyyənin təsərrüfat obyektləri isə təmir-tikinti müəssisəsi və bələdiyyə parkıdır. Bələdiyyənin ərazisində fəaliyyət göstərən Məhəllə komitələrinin sayı 135-dir, məhəllə komitələri üzvlərinin sayı isə 1262 nəfərdir.

Bələdiyyənin ölkə bələdiyyələrinin birliklərində iştirakı da təmin olunub. Belə ki, Sumqayıt şəhər bələdiyyəsi 2006-cı ildən Azərbaycan şəhər Bələdiyyələri Milli Assosiasiyasının üzvüdür.

Sumqayıt bələdiyyəsinə 1999-cu ildə ilk dəfə keçirilən seçkilərdə Zakir Fərəcov, Şahbala Kərimov, Akif Kərimov, Nəsimi Allahverdiyev, Əbülfəz Babayev, Gülrəng Cümşüdova, Rafiq Dəmirov, Vasif Əfəndiyev, Ağamirzə Əhədov, Cəbrayıl Əlinağıyev, Seyfulla Əsədullayev, Tofiq Hüseynli, Asif İmaməliyev, Zaman İsgəndərov, İslam İslamov, Eldar İsmayılov, Sahib Qarayev, Səlim Məmmədov və Yusif Salmanov bələdiyyə üzvü seçiliblər. 

Həmin dönəmdə Zakir Fərəcov Sumqayıt şəhər Bələdiyyəsinin sədri olub. O, 2004-cü ilə kimi bələdiyyənin sədri kimi fəaliyyət göstərib. Z.Fərəcovdan sonra isə sədr postuna professor  Əbülfəz Babayev seçilib. Z. Fərəcov 2005-ci ilin avqust ayının 11-dən isə Abşeron rayon İcra Hakimiyyətinin başçısı vəzifəsinə keçib.

2004-cü ildə keçirilən seçkilərdə isə Əbülfəz Babayev, Akif Kərimov, Ağarəhim Abdullayev, Mönsüm Alışov, Rafiq Dəmirov,Ağamirzə Əhədov, Seyfulla Əsədullayev, Sədaqət Əsədova, Bəylər Əzizov, Mütəllim Əmənov, Eldar İsmayılov, Olya İslamova, Salam İsmayılzadə, Raqif İbrahimov, Ucal Qasımov, Fəxrəddin Rəhimov, Səidə Səfərova və Müşfiq Tarverdiyev yerli özünüidaəetmə orqanına seçildilər. Bu dəfə də Əbülfəz Babayev sədr seçildi.

 2009-ci il seçkilərində isə Əbülfəz Babayev, Akif Kərimov, Zeynab Məmmədyarova,Kazım Rzayev, Pərvanə Səfərova, Şahbaz Cavadov, Leyla Abdullayeva, Sultan Əsədov, Rafiq Dəmirov, Mətanət Pirquliyeva, Emil Abbasov, Yusif Salmanov, İlqar Nuriyev, Fəxrəddin Rəhimov, Əliaslan Əliyev, Mədət Mustafayev, Nilufər Məsimova və Məmməd Hacıyev Sumqayıt bələdiyyəsinin üzvü oldular.

 2014-cü il seçkilərində isə Əbülfəz Babayev, Sultan Əsədov, Zeynəb Məmmədyarova, Musa Həsənov, Məmməd Hacıyev, Aygün Əhmədova, Ramiz Hüseynov, Akif Kərimov, Fərid Dəmirov, Emil Abbasov, Raqif İbrahimov, İlqar Cavadov, Fəxrəddin Rəhimov, Elbrus Səlimov, Günel Qiyasova, Elvin Məmmədzadə, Yusif Salmanov, İradə Talıbova və Kifayət Vidadiyeva qalib oldular.

 Sumqayıt bələdiyyəsinin 15 ilini təhlil edəndə müşahidə etmək olar ki, ilk bələdiyyə üzvləri arasında gənc nəslin nümayəndəsinə rast gəlinmir. Üstəlik 1999-cu ildə keçirilən bələdiyyə seçkilərində bələdiyyəyə seçilən 19 üzvdən yalnız biri qadındır. 2004-cü ildə bələdiyyə üzvləri arasında gənc nəslin nümayəndələrinə rast gəlmək olur. Qadınların sayı isə 4-dür. 2009-ci ildə isə xanımların sayı 5-ə çatdı. Burada da gənc nəslin nümayəndələri var. Son seçkilərə gəldikdə isə Sumqayıt bələdiyyəsinin tərkibində cavanlaşma prosesini müşahidə etdik. Belə ki, dekabrın 23-də keçirilən seçkilərdə bələdiyyə üzvü hüququnu qazananların əksəriyyəti gənclərdir. Xanımların isə sayı əvvəlki kimi öz yerində qaldı. Bələdiyyə seçilən üzlərdən 13 nəfəri YAP-ın üzvüdür. Kifayət Vidadiyevanı da bura əlavə etsək hakim partiyada olan bələdiyyə üzvlərini sayı 14-ə çatacaq. Baxmayaraq ki, K.Vidadiyevanın namizədliyi bitərəf kimi irəli sürülüb.

Sumqayıt bələdiyyəsinin tanınmışları

 Sumqayıt bələdiyyəsinin 15 ilin müşahidə etsək, görərik ki, bələdiyyədə bütün seçkilərdə üstünlük qazanmış şəxslər var.

 Görkəmli elm xadimi Əbülfəz Babayev - 1999, 2004, 2009, 2014-cü illərdə bələdiyyə üzv seçilib və 2004-cü ildən 2014-cü ilə kimi bələdiyyənin sədri olub. Son bələdiyyə seçkilərində də ən çox səs toplayan Ə.Babayevdir. Ehtimal edilir ki, Babayev növbəti 5 ildə də Sumqayıt şəhər Bələdiyyəsinə rəhbərlik edəcək. Avropa Şurası Yerli və Regional Hakimiyyətləri konqressinin üzvü, Azərbaycan nümayəndə heyəti rəhbərinin müavinidir.

Akif Kərimov - Ə.Babayevlə 1999-cu ildən bir yerdə addımlayır. O, da 1999, 2004, 2009, 2014-cü illərdə bələdiyyə üzvlüyünü qazanıb. Sumqayıtın bələdiyyə sistemində ən təcrübəli şəxslərdəndir. Bu müddətdə bələdiyyə sədrinin müavini postunda çalışıb. Sovet dönəminə Sumqayıt şəhər Xalq Deputatları Sovetinin deputatı və Sumqayıt şəhər Xalq Deputatları Soveti İcraiyyə Komitəsinin sədri müavini, Sumqayıt şəhər Xalq Deputatları Sovetinin sədri vəzifələrində çalışıb.

Digərlərinə gəldikdə isə Yusif Salmanov 1999, 2009, 2014-cü illərdə, Fəxrəddin Rəhimov 2004,2009,2014-cü illərdə, Rafiq Dəmirov isə 1999, 2004, 2009 bələdiyyəyə üzv seçiliblər.

 Digər üzvlər:

Emil Abbasov (2009, 2014)

Sultan Əsədov (2009, 2014)

Zeynəb Məmmədyarova (2009, 2014)

Raqif İbrahimov (2004, 2014)

Məmməd Hacıyev (2009, 2014)

 İlk dəfə seçilənlər isə Musa Həsənov (Sumqayıt şəhər Gənclər və İdman Baş İdarəsinin keçmiş rəisi), Aygün Əhmədova, Ramiz Hüseynov, Fərid Dəmirov, İlqar Cavadov, Elbrus Səlimov, Günel Qiyasova, Elvin Məmmədzadə, İradə Talıbova və Kifayət Vidadiyevadır.

 Ümidvarıq ki, növbəti 5 ildə Sumqayıt şəhər bələdiyyəsinin fəaliyyəti yalnız təqdir olacaq.

Ramil ZEYNALLI, Xeberle.com