"Basabasın yaranması da xəstələrin böyük əksəriyyətinin dərmanı məhz ayın əvvəlində almaq istəkləri üzündən baş verir"

Bu günlərdə bir çox xəbər saytlarında Sumqayıt şəhər 1 saylı poliklinikada şəkər xəstələri ilə poliklinikanın həkim və köməkçiləri arasında insidentin baş verdiyindən bəhs edən videogörüntülü informasiya yayılıb. İnformasiyada qeyd edilib ki, poliklinikada xəstələrə resept verilməyib,bunun da səbəbi kimi həkim və köməkçilərin düzgün işləyə bilməməsi göstərilib.
Məsələyə aydınlıq gətirmək üçün 1 saylı şəhər poliklinikasının baş həkimi Yusub Yusubova müraciət etdik. Baş həkim Xeberle.com-a məlumat verdi ki, bu günə qədər poliklinikada qeydiyyatda olan şəkərli diabet xəstələri dərmanları gəlib poliklinikanın özündən alırdılar: "Artıq 2015-ci ilin yanvar ayından etibarən poliklinikada qeydiyyatda olan xəstələrə resept yazılır. Xəstələr həmin resept əsasında dərmanı Dəri-Zöhrəvi Dispanserinin nəzdində yaradılmış aptekdən alırlar. 1saylı poliklinikanın qeydiyyatında hazırda şəkərli diabetdən əziyyət çəkən 2335 nəfər xəstə var. Xəstələrdən də kimisi 2, kimisi də 3 dərman alır. Gün ərzində hər həkim 3 saata yalnız 5-6 xəstəyə resept yaza bilər. Buna baxmayaraq, növbədə gözləyən xəstələrin çoxluğunu nəzərə alaraq elə gün olur ki, həkimlər 50 nəfər və daha çox xəstə yola salır. Poliklinikada kaprizli, əsəbi xəstələrimiz var. Onları biz artıq tanıyırıq. Əvvəlki qaydada belə xəstələri öncədən dərmanla təmin edib, tez yola salırdıq ki, çox əziyyət çəkməsinlər.İndi qayda dəyişib. Hamı bir nəfər kimi səbrlə öz növbəsini gözləməlidir. Mübahisə də məhz növbəyə nizamlı şəkildə durmayan xəstələrin üzündən baş verib. Həmin gün növbədə olan həkim Bəbirovdan hər kəs birinci reseptin ona verilmsəini tələb ediblər. Növbə tutan və növbəsiz keçmək istəyən xəstələr həkimin otağında basdırıq yaradıblar. Bu üzdən xoşagəlməz mübahisələr yaranıb. Hətta, vəziyyət o həddə çatmışdı ki, sakitlik yaratmaq üçün az qalırdıq polisdə müraciət edək. Mən demək olar bir həftədir fasiləsiz işləyirəm. Nahar fasiləsinə də getmirəm.Çünki reseptə möhürü yalnız mən vurmalıyam. İş indi başlayıb, yarım saat ərzində 15 xəstə yola salmışıq. Ayın əvvəlində dərman alan xəstələr daha çox olur. Basabasın yaranması da xəstələrin böyük əksəriyyətinin dərmanı məhz ayın əvvəlində almaq istəkləri üzündən baş verir. Halbuki, resepti bir ay müddətində ala bilərlər. Ayın 17-dən sonra demək olar ki, heç kim olmur”.
Gələn aydan etibarən vəziyyətin düzələcəyini və öz qaydasına düşəcəyini bildirən Y.Yusubov, anoloji vəziyyətin 2 və 3 saylı poliklinikalar üçün də xarakterik olduğunu vurğuladı. Qeyd edək ki, təkcə Sumqayıt şəhərində qeydiyyatda 7000 yaxın şəkərli diabetdən əziyyət çəkən xəstə var.

Aytən Əli
Xeberle.com